Fýtzaldan Qazaqstan quramasy Eýropa chempıonatyna joldama aldy
ASTANA. QazAqparat - Fýtzaldan 2018 jylǵy Eýropa chempıonatyna irikteý saıysyn asa sátti ótkizgen Qazaqstan quramasy joldamany jeńip aldy, dep habarlaıdy «QazAqparat» tilshisi.
«Qazsport» telearnasynan tikeleı efırde kórsetkenindeı, búgin qazaqstandyqtar «Almaty Arenada» Chehııa quramasyn bet qaratpaı, 3:0 esebimen utty. Tórtinshi topta atalmysh qos komanda osyǵan deıin jeńilmegen bolatyn. Sondyqtan qaı utqany Eýropa chempıonatyna tikeleı beriletin jalǵyz joldamany qanjyǵasyna baılaıtyn edi. Qazaqstandyqtar muny tabysty oryndaı bildi. Dýglas qos doptyń avtory atansa, Mıhaıl Pershın taǵy bir goldy soqty.
Munyń aldynda brazılııalyq maman Joze Alesıo baptaıtyn Qazaqstan quramasy Danııany 5:0, Makedonııany 3:0 esebimen tize búktirgen bolatyn. Sóıtip olar bul irikteý týrnırinde Igıta qorǵaǵan qaqpaǵa birde-bir gol ótkizgen joq. Oǵan qosa qurama sapynda qazaq fýtzalshylarynyń kóbeıe bastaǵany qýantady.
Aıta keteıik, fýtzaldan 2018 jylǵy Eýropa chempıonaty 30 qańtar - 10 aqpan aralyǵynda Slovenııa astanasy Lıýblıana qalasynda ótedi. Sóıtip ótken jyly Eýropa chempıonatyna alǵash ret qatysyp, birden qola júldeni jeńip alǵan qazaqstandyqtar qurlyq birinshiligine ekinshi ret baq synamaq.
