Fýtzaldan Qazaqstan quramasy Ázerbaıjanmen joldastyq kezdesý ótkizedi
NUR-SULTAN. QazAqparat - Fýtzaldan Qazaqstan quramasy qyrkúıek aıynda Ázerbaıjanmen eki márte joldastyq kezdesý ótkizedi, dep habarlaıdy QazAqparat tilshisi.
Oıyndar 19-20 qyrkúıek kúnderine josparlanǵan. Eki kezdesý de Aqtaý qalasyndaǵy «Halyq Arena» sport kesheninde ótedi dep josparlanǵan. Bul fýtzaldan 2024 jylǵy álem chempıonatyna irikteýge daıyndyq esebinde uıymdastyrylyp otyr.
Qazaqstandyq fýtzalshylar atalǵan týrnırdiń negizgi satysyndaǵy irikteý kezeńinde besinshi topta synǵa túsedi. Qarsylastary - Slovenııa jáne Chernogorııa. Іrikteý kezeńi 2022 jyldyń 8 qazanynda bastalyp, 2023 jyldyń 8 naýryzynda aıaqtalady.
Eske sala keteıik, negizgi satysyndaǵy irikteý kezeńi 12 toptan turady. Ár toptyń jeńimpazdary men ekinshi oryn alǵan tórt úzdik komanda tikeleı elıtalyq kezeńge shyǵady.
Álem chempıonaty 1989 jyldan beri turaqty ótkizilip keledi. Qazaqstan quramasy atalǵan dodada úsh márte baq synady. 2021 jyly tórtinshi orynǵa turaqtady.
