Fýtzaldan Qazaqstan quramasynyń burynǵy oıynshysy jańa qyzmetke taǵaıyndaldy
ASTANA. KAZINFORM – Fýtzaldan Qazaqstan ulttyq quramasynyń bapkerler quramynda ózgeris boldy. Dinmuhambet Súleımenov bas bapkerdiń assıstenti qyzmetine taǵaıyndaldy.
Súleımenov buǵan deıin de bas bapker Kakaýdyń jetekshiligimen ulttyq quramamen jáne «Qaırat» klýbymen birge óner kórsetip, birqatar jetistikke jetken. Endi olar bapkerlik quramda qaıta birigip, komandanyń damýyna atsalysady.
Dinmuhambet 1981 jyly dúnıege kelgen. Kásibı mansabynda 20 jyldan astam ýaqyt boıy elimizdiń túrli klýbtarynda oınady. Onyń ishinde 10 jylǵa jýyq almatylyq «Qaırat» komandasynyń namysyn qorǵady. Tanymal fýtzalshy Qazaqstannyń 9 dúrkin chempıony jáne úsh márte kúmis jáne qola medal ıegeri boldy.
Ol sondaı-aq Eýropa chempıonatynyń qola júldesin ıelenip, eki márte UEFA kýbogynyń jeńimpazy atanǵan.
2022 jyly D.Súleımenov oıynshy mansabyn aıaqtaǵannan keıin bapkerlik qyzmetke keldi. Búginge deıin ol aqtaýlyq «Kaspıı» klýbyna jetekshilik etti.
Eske sala keteıik, buǵan deıin Dinmuhambet Súleımenovtiń «Taraz-Omega» fýtzal klýbyna bas bapker bolǵanyn jazǵanbyz.