Fýtzaldan Qazaqstan quramasy joldastyq kezdesýde Ózbekstanǵa ese jiberdi

ASTANA. KAZINFORM - Fýtzaldan Qazaqstan ulttyq quramasynyń joldastyq kezdesýde Ózbekstanǵa ese jiberdi.

Kezdesý barysynda el quramasynan Arnold Knaýb (5, 20, 40-mınýtarda) het-trıktiń avtory atansa, Rashıt Jahangır (2-mınýt) jáne Edson (38-mınýt) bir-birden gol soqty.

Oǵan ózbekstandyq fýtzalshylar alty golmen jaýap qaıyrdy.

Osylaısha el quramasy qarsylasyna 5:6 esebimen ese jiberdi.

Bas bapker Paýlo Rıkardo Kaka sáýirdegi oqý-jattyǵý jıynyna tek Qazaqstan chempıonatynda óner kórsetetin oıynshylardy shaqyrdy. Al Birjan Orazov, Dáýren Tursaǵulov jáne Dýglas jaraqattaryna baılanysty jıynǵa qatysqan joq.

Aıta ketsek, eki qurama arasyndaǵy 7 sáýirdegi taǵy bir joldastyq kezdesýde 2:2 esebi tirkeldi.
Qazaqstan quramasy álem chempıonatynyń fınaldyq satysynda 2000, 2016, 2021 jyldarda synǵa túsip, 2021 jyly 4-orynǵa taban tiredi.

El quramasy álem chempıonaty irikteý satysynda A tobynda Rýmynııa, Ázerbaıjan jáne Nıderlandpen oınap, birde-bir kezdesýde upaı joǵaltqan joq. Nátıjesinde olar bıyl 14 qyrkúıek pen 6 qazan aralyǵynda Ózbekstanda bolatyn dúbirli dodaǵa joldama aldy.

Al ózbekstandyq fýtzalshylar álem chempıonaty fınaldyq satysyna 2016, 2021 jyldarda eki márte qatysyp, 2021 jyly 1/8 fınalǵa deıin jetti.

Eske salsaq, 4 sáýirde el quramasy joldastyq kezdesýde Qyrǵyzstandy 3:2 esebimen jeńdi.