Fýtzaldan Qazaqstan quramasy ekinshi joldastyq kezdesýde de Ázerbaıjandy jeńdi
ASTANA. KAZINFORM - Búgin fýtzaldan Qazaqstan ulttyq quramasy Aqtaý qalasynda Ázerbaıjanmen ekinshi joldastyq kezdesýin ótkizdi.
FIFA kúntizbesine sáıkes otandastarymyz 5-15 sáýir aralyǵynda oqý-jattyǵý jıynyn uıymdastyrdy. Kakaý bastaǵan otandastarymyz oqý-jattyǵý jıyny aıasynda Aqtaý qalasynda Ázerbaıjan quramasymen 13 jáne 15 sáýir kúnderi eki joldastyq matchta sheberlik baıqasty.
Otandastarymyz búgingi kezdesý barysynda belsendi oıyn kórsetti. Olardyń qatarynan Azat Valıýllın 14, Albert Aqbalyqov 17, 28, Damır Qaıyrbaı 33-mınýtta mergendik tanytsa, oǵan ázerbaıjandyq quramadan Ýlvı Alıev 15, Adalat Alakbarov 18-mınýtta eki golmen jaýap qaıyrdy.
Osylaısha ulttyq qurama qarsylasyn 4:2 esebimen tize búktirdi.
Aıta ketsek, eki qurama arasynda 13 sáýirde ótken joldastyq kezdesýde el quramasy qarsylasynan 9:2 esebimen basym túsken edi.
Qazaqstan quramasynyń tizimi
Qaqpashylar: Leo Igıta, Narýn Serikov («Aqtóbe»), Dáýlet Zatybekov («Tulpar»);
Alańdaǵy oıynshylar: Edson, Birjan Orazov (ekeýi – «Qaırat»), Arnold Knaýb, Ábdirasýl Ábdimanapuly, Erjan Karmenov (ekeýi – «Semeı»), Azat Valıýllın («Aıat»), Jahangır Rashıt («Atyraý»), Aqjol Dáribaı («Tulpar»), Nursultan Tańatuly, Damır Qaıyrbaı (ekeýi – «Kaspıı»), Albert Aqbalyqov («Aqtóbe»), Aqedil Madııarov («Baıterek»), Aleksandr Derıabın («Tıýmen», Reseı).
Aıta ketsek, el quramasy 2026 jylǵy Eýropa chempıonatynda óz tobynda ekinshi oryndy mise tutty.
Aldymen Albanııany 2:0 esebimen jeńse, odan keıin Armenııamen 4:4 esebimen teń oınady. Úshinshi kezdesýinde Danııadan 2:3 esebimen jeńilip qalsa, óz alańynda atalǵan qarsylasyn 7:3 esebimen tize búktirgen edi. Besinshi oıynda Albanııadan 4:2 esebimen basym tússe, dál sondaı eseppen syrt alańda Armenııaǵa ese jiberdi.
Odan keıin pleı-off satysynda otandastarymyz Italııa quramasyna (2:1, 2:3, penaltıden 0:1) jol berdi.
