Fýtzaldan Qazaqstan quramasy búgin álem chempıonaty irikteý kezeńin bastaıdy
ASTANA. KAZINFORM — Fýtzaldan Qazaqstan quramasy búgin, 20 qazanda elordada 2028 jylǵy álem chempıonaty negizgi irikteý kezeńinde Belarýspen kezdesedi.
Bul oıyn Qazaqstan ýaqytymen 20:00–de bastalyp, Qazsport telearnasynan tikeleı efırde kórsetiledi.
Ulttyq qurama oıynshylary aldymen oqý-jattyǵý jıynyna 10 qazanda Astanada jınaldy.
Qazaqstan quramasynyń tizimi
Qaqpashylar: Igıta, Talgat Ótepbergenov, Narýn Serikov.
Alańdaǵy oıynshylar: Birjan Orazov, Jahangır Rashıt, Arnold Knaýb, Nursultan Pııaly, Dýglas, Edson, Erjan Karmenov, Nurqanat Baktııarov, Aleksandr Derıabın, Rınat Tóreǵazın, Albert Akbalyqov, Azat Valıýllın, Dáýren Tursaǵulov.
Aıta keteıik, irikteýdiń negizgi kezeńinde 36 ulttyq qurama baq synaıdy. Olar úsh quramadan 12 topqa bólindi. Matchtar úıde jáne syrt alańda ótedi.
Jerebe qorytyndysy boıynsha Qazaqstan quramasy 6-topqa túsip, Belarýs jáne Albanııa quramalarymen kezdesedi.
Negizgi raýnd matchtary 2026 jylǵy 12-21 qazan, 2-11 qarasha, 6-9 jeltoqsan aralyǵynda jáne 2027 jylǵy 22 aqpan men 3 naýryz aralyǵynda ótedi.
Negizgi kezeńniń qorytyndysy boıynsha barlyq 12 toptyń jeńimpazy men ekinshi oryn alǵan úzdik tórt qurama elıtalyq raýndqa tikeleı joldama alady. Al ekinshi oryn ıelengen qalǵan segiz komanda pleı-off kezeńinde álem chempıonatynyń kelesi satysyna shyǵý úshin kúresin jalǵastyrady.
Qazirge deıin fýtzaldan Qazaqstan quramasy álem chempıonaty fınaldyq kezeńine tórt márte qatysty. Ázirshe eń joǵary jetistigi — 2021 jylǵy tórtinshi oryn.
