Fýtzaldan Qazaqstan quramasy 8 qyrkúıekte Argentınamen joldastyq kezdesý ótkizedi

ASTANA. KAZINFORM - Erteń, 8 qyrkúıek kúni Almaty qalasynda fýtzaldan Qazaqstan men Argentına quramalary arasynda joldastyq match ótedi.

Kezdesý elorda ýaqytymen saǵat 19:00-de bastalady.

Fýtzaldan Argentına quramasy álemde tájirıbeli komandanyń biri sanalady. Olar dúbirli dodaǵa 10 márte qatysty. 2016 jyly álem chempıony ataǵyn jeńip alsa, 2021 jyly qola júldege qol sozdy. Ońtústik Amerıka qurlyǵynda úsh márte jeńis tuǵyryna kóterilgen.

Aıta ketsek, bıyl 14 qyrkúıek pen 6 qazan aralyǵynda Ózbekstanda ótetin álem chempıonatynda el quramasy Ispanııa, Lıvııa jáne Jańa Zelandııamen sheberlik baıqasady.

Al Argentına quramasy S tobynda Ýkraına, Aýǵanstan jáne Angolamen sheberlik baıqasady.

Atalǵan synda el namysyn qorǵaıtyn Qazaqstan quramasynyń tizimi belgili boldy. Atap aıtqanda, qaqpada Narýn Serikov, Leonardo Igıta bolsa, oıynda Arnold Knaýb, Rınat Tóreǵazın, Aqjol Dáribaı, Ábdirasýl Ábdimanapuly, Azat Valıýllın, Leo, Albert Aqbalyqov, Shyńǵys Esenamanov, Birjan Orazov, Dáýren Tursaǵulov, Jahangır Rashıt, Dýglas Jýnıor bar.

Bul - el quramasynyń álem chempıonaty aldyndaǵy sońǵy joldastyq oıyny.

Qazaqstandyq fýtzalshylar budan buryn Tájikstan quramasymen eki márte joldastyq kezdesýde 4:3, 3:0 esebimen jeńiske jetti.

Odan keıin Iran quramasyn aldymen 3:0 esebimen tize búktirip, odan keıin 1:1 esebimen teń tústi.