Fýtzaldan «Qaırat» ıspanııalyq «Interdi» jeńdi
ALMATY. QazAqparat - Almatylyq «Qaırat» fýtzal klýby ÝEFA kýbogynyń tórt dúrkin chempıony ıspanııalyq «Inter» klýbyn 4:1 esebimen oısyrata jeńdi, dep habarlaıdy QazAqparat tilshisi.
Eki klýbtyń kezdesýi qarsylastyń alańynda Madrıd provıntsııasyna jatatyn Torrehon-de-Ardos mýnıtsıpalıtetinde ótti. Kezdesý «Inter» klýbynyń uıymdastyrýymen osymen 3-shi jyl qatarynan ótkizilip otyrǵan «Torrehon jáne Manýel Saorın memorıaly kýbogy aıasynda ótti. Bıylǵy saıys «Inter» shaǵyn fýtbolynyń 40 jyldyǵyna arnalǵan. Eki klýbta saıys alańyna eń myqty oıynshylaryn shyǵardy. Qarsylas komanda alań ıesi retinde alǵashqy taımda almatylyqtardy tyqsyryp, Elısandronyń eptiligimen alǵashqy bolyp esep ashty.
Alaıda, ekinshi taımda almatylyqtar ıspandyqtardyń adymyn ashtyrmady. Ekinshi taımnyń úshinshi mınýtynan keıin «Qaırattyń» jańa oıynshysy týnıstik legıoner Taıebı tarazy basyn teńestirdi. 29-shy mınýtta almatylyq klýbtyń qaqpashysy Igıta óz «ádetine» salyp, oıynǵa aralasty. Kóp uzatpaı Igıta qarsylastyń qaqpasyna ekinshi goldy súńgitti. Nátıjesinde, qazaqstandyq klýbtyń qaqpashysy alystan salǵan gol eń úzdik bolyp esepteldi. Oıynnyń aıaqtalýyna 7 mınýt qalǵanda brazılııalyq legıoner Felıpe 3-shi goldy salsa, tórtinshi goldy ıspandyqtardyń ashyq qalǵan qaqpasyna Dýglas dál baǵyttap, qarsylastyń oısyraı jeńilýine sebep boldy.
Eske sala keteıik, ÝEFA kýboginde Almatyda ótken kezdesýden «Qaırat» «Interden» 2:3 esebimen jeńilgen bolatyn. Almatylyq «Qaırat» mını fýtbol klýby - ÝEFA kýbogynyń eki dúrkin jeńimpazy.
