Fýtzaldan Eýropa chempıonaty: Qazaqstan Ýkraınamen kezdesedi
NUR-SULTAN. QazAqparat - Búgin fýtzaldan 2022 jylǵy Eýropa chempıonatynda Qazaqstan quramasy shırek fınaldaǵy oıynyn Ýkraınaǵa qarsy ótkizedi, dep habarlaıdy QazAqparat tilshisi.
Kezdesý Nıderlandy astanasy Amsterdam qalasyndaǵy stadıonynda ótkiziledi. Kezdesý elorda ýaqytymen 01.00-de bastalyp, Qazsport telearnasynan tikeleı efırde kórsetiledi.
Atalǵan oıynda toptyq kezeńdegi alǵan sary qaǵazyna baılanysty Edson men Taınan alańǵa shyqpaıdy. Sondaı-aq, jaraqatyna baılanysty Azat Valıýllın kezdesýden tys qalyp otyr.
Eske salsaq, V tobynda synǵa túsken Qazaqstan quramasy 7 upaımen birinshi oryn aldy. Alǵashqy oıynda Slovenııamen (4:4) teń túsip, odan keıin Fınlıandııany (6:2) jáne Italııany 4:1 esebimen tize búktirdi.
Ýkraına A tobynda úsh upaımen ekinshi oryn aldy. Ýkraınalyq fýtzalshylar Serbııadan 6:1 esebimen basym túsip, Nıderlandy (2:3) men Portýgalııaǵa (0:1) jol berdi.
Jeńiske jetken jaǵdaıda Qazaqstan quramasy jartylaı fınalda Reseı men Grýzııa jubynyń jeńimpazymen kezdesedi.
