Fýtzaldan Eýropa chempıonaty: Qazaqstan quramasy alǵashqy kezdesýinde reseılikterge ese jiberdi
ASTANA. QazAqparat - Serbııanyń Belgrad qalasynda fýtzaldan Eýropa chempıonatynda Qazaqstan quramasy alǵashqy kezdesýin reseıliktermen ótkizip, bir ǵana dop aıyrmasymen (1:2) ese jiberdi.
Álemdik reıtıngte úshinshi satyda turǵan Reseı dúnıe júzindegi myqty komandalardyń biri bolsa, nebári 15-inshi oryndaǵy qazaqstandyqtar Eýropa birinshiligine tuńǵysh ret qatysýda.
Alma-kezek shabýylmen órbigen matchtyń birinshi kezeńiniń orta tusynda alańǵa shyqqan reseılik Dmıtrıı Lyskovtyń eki márte dál pasynan keıin Romýlo Qazaqstan quramasynyń esin jıǵyzbastan, esepti bir-aq mınýttyń ishinde 2:0-ge jetkizdi. Budan soń qazaqstandyqtardyń bas bapkeri Kakaý taım-aýt alyp, shákirtterine der kezinde aqyl-keńesin berdi. Osydan keıin qaqpashy Igıta da alǵa shyǵyp, onyń qatty soqqysynan keıin 13-mınýtta Qazaqstan quramasynyń oıynshysy Serik Jamanqulov esepti qysqartty. Bul - qazaqstandyqtardyń Eýropa chempıonatynda soqqan alǵashqy goly.
Ekinshi taımda qarsylastardyń birneshe márte gol soǵatyn múmkindikteri bolǵanymen, esep ózgergen joq.
C tobynda óner kórsetetin qazaqstandyqtar kelesi oıynyn 5 aqpan kúni álemdik reıtıngte ózinen keıin 16-orynda kele jatqan Horvatııa komandasymen ótkizedi. Ár topta úsh komanda bolsa, sonyń ekeýi 13 aqpanǵa deıin sozylatyn jarysty jalǵastyrady. Sondyqtan Qazaqstan quramasyna Horvatııany qalaıda jeńý qajet.
