Fýtzaldan Eýropa chempıonaty: Fınaldyq kezeńge joldama alǵan quramalar anyqtaldy
NUR-SULTAN. QazAqparat - Fýtzaldan 2022 jylǵy Eýropa chempıonaty toptyq irikteý kezeńindegi besinshi toptaǵy oıyndar máresine jetti, dep habarlaıdy QazAqparat tilshisi.
Esterińizge sala ketelik, atalǵan topta Qazaqstan quramasy synǵa tústi. Qarsylastary - Belarýs, Vengrııa jáne Izraıl quramalary.
Qazaqstan quramasy irikteý kezeńinde birde-bir upaı joǵaltqan joq. Atap aıtqanda, Vengrııa (5:0, 6:1) men Belarýsti (5:2, 6:1) qapy qaldyryp ketti. Odan keıin elordada Izraıldi (4:1, 4:0) esebimen tize búktirdi.
Búgin, 13 sáýirde atalǵan toptaǵy Belarýs óz alańynda Vengrııany 5:2 esebimen tize búktirdi. Osylaısha atalǵan topta toǵyz upaımen ekinshi orynǵa taban tiredi. Búgingi jeńisinen keıin belarýstik fýtzalshylar jarystyń fınaldyq satysyna shyqty.
Bul topta 18 upaımen Qazaqstan Eýropa chempıonatyna tikeleı joldama aldy. Al Vengrııada - 6, Izraılde - 3 upaı bar.
Ázirge fınaldyq kezeńge joldama alǵan 14 qurama belgili. Olardyń qatarynda Qazaqstannan ózge Nıderlandy, Horvatııa, Reseı, Ázerbaıjan, Bosnııa jáne Gertsogovına, Qazaqstan, Ispanııa, Italııa, Portýgalııa, Grýzııa, Slovenııa, Fınlıandııa, Ýkraına jáne Belarýs quramalary bar.
Eýropa chempıonatynyń fınaldyq satysy 2022 jyldyń 19 qańtar jáne 6 aqpan aralyǵynda Nıderlandynyń Amsterdam jáne Gronıngen qalalarynda ótkiziledi.
