Fýtzaldan Eýropa chempıonaty: Búgin Qazaqstan-Italııa matchy tikeleı efırden kórsetiledi
ASTANA. QazAqparat - 9 aqpannan 10 aqpanǵa qaraǵan túni Astana ýaqytymen saǵat 01.50-de Serbııa astanasy Belgradta fýtzaldan ótip jatqan Eýropa chempıonatynda Qazaqstan men Italııa quramalarynyń arasyndaǵy shırek fınaldyq kezdes ótedi, dep habarlaıdy «Qazaqstan» RTRK» AQ baspasóz qyzmeti.
Qazaqstan quramasynyń qurlyq birinshiliginiń fınaldyq kezeńine shyǵýynyń ózi mamandar úshin sensatsııa bolǵany anyq. Biraq Qazaqstandyq fýtbolshylar týrnır barysynda Belgradqa jaı kelmegenin dáleldeýde. Atap aıtsaq, týrnır favorıtteriniń biri Reseı quramasy bizdiń oıynshylardan jeńilmeı ketkenin oljaǵa balaýda. Al Dinmuhamed Súleımenov pen onyń áriptesteri Horvatııa quramasyn ońaı utyp, shırek fınalǵa joldama aldy.
Bizdiń kelesi qarsylasymyz - Italııa quramasy. Eki jyl buryn Kári qurlyqtyń úzdigi atanǵan komandaǵa qarsy match qalaı aıaqtalsa da, Qazaqstan quramasynyń fýtbolshylarynyń Eýropa chempıonatyndaǵy keremet oıyny - zor jetistik. Qazaqstan - Italııa quramalarynyń arasyndaǵy matchtyń tikeleı kórsetilimin búgin saǵat 01.50-de "Qazaqstan" ulttyq arnasynan tamashalaýǵa bolady.
