Fýtzaldan Eýropa chempıonaty: Birjan Orazov úzdik surmergen atandy
NUR-SULTAN. QazAqparat - Fýtzaldan 2022 jylǵy Eýropa chempıonatynda qazaqstandyq Birjan Orazov úzdik surmergen atandy, dep habarlaıdy QazAqparat tilshisi.
Qazaqstandyq fýtzalshy qurlyqtyq dodada barlyǵy 7 gol soqty. Ol ózi qatysqan barlyq kezdesýde «qanjyǵasyn maılady».
Aldymen toptyq kezeńde Slovenııamen kezdesýinde bir márte qaqpany dál kózdese, odan keıin Fınlıandııa, Italııa qaqpashylaryn eki márte qapy qaldyrdy. Shırek fınalda Ýkraınamen oıynda da eki márte dáldigimen kózge tústi.
Ekinshi oryn reseılik Anton Sokolov aldy. Onyń enshisinde alty gol bar. Surmergender sapynda reseılikter - Artem Antoshkın men Ivan Chıshkala bes-besten gol soqsa, taǵy bir qazaqstandyq Dýglas Jýnıor tórt goldyń avtory atandy.
Eske salsaq, bıylǵy qurlyqtyq dodada Qazaqstan quramasy da básekege tústi. V tobynda baq synaǵan otandastarymyz alǵashqy oıynda Slovenııamen (4:4) teń túsip, odan keıin Fınlıandııany (6:2) jáne Italııany 4:1 esebimen tize búktirdi. Nátıjesinde 7 upaımen birinshi oryn aldy. Al shırek fınalda Ýkraınaǵa 3:5 esebimen jol berdi.
Aıta ketsek, bıylǵy Eýropa chempıony ataǵyn Portýgalııa jeńip aldy. Ekinshi oryn Reseıge buıyrsa, úzdik úshtikti Ispanııa túıindedi.
