Fýtzaldan Eýropa birinshiliginiń fınaldyq kezeńi Qazaqstanda óte me
ASTANA. QazAqparat - Qazaqstan fýtzaldan 2022 jylǵy Eýropa chempıonaty fınaldyq kezeńin qabyldaýǵa nıet jasap otyr, dep habarlaıdy QazAqparat tilshisi.
ÝEFA-nyń habarlaýynsha , fınaldyq kezeńdi qabyldaýǵa usynys jasaý 2018 jyldyń 12 qazanynda bastalyp, 21 qańtarda máresine jetti.
Belgili bolǵandaı, búgingi kúnderi atalmysh dop dodasyn ótkizýge Qazaqstannan ózge Bosnııa jáne Gertsegovına, Lıtva, Gollandııa, Portýgalııa, Frantsııa jáne Shvetsııa elderi de nıet tanytty. ÝEFA atqarý komıteti fınaldyq kezeńdi ótkizý múmkindigine ıe bolǵan memleketti 2019 jyldyń 24 qyrkúıeginde anyqtaıtyn bolady.
Atalmysh dúbirli doda alǵash 1996 jyly ótkizildi. 1999 jyldan beri árbir eki jyl saıyn jalaýyn kóteredi. 2010 jylǵa deıin fınaldyq kezeńge segiz qurama qatysatyn bolsa, sol jyly olardyń sany 12-ge jetti.
2022 jyldan bastap atalmysh dúbirli dodany ótkizý tártibi ózgeredi. Ol tórt jylda bir márte uıymdastyrylady. Oǵan qatysatyn quramalar sany 16-ǵa kóbeıedi.
Qazaqstan Eýropa qurlyǵynda 2002 jyldan beri synǵa túsip keledi. Sol jyly Qazaqstan fýtbol federatsııasy ÝEFA quramyna qabyldandy. Bizdiń qurama 2016 jyly qola júldeger atansa, 2018 jyly tórtinshi orynǵa taban tiredi.
Budan buryn fýtzaldan 2020 jylǵy Álem chempıonatynyń alǵashqy jáne negizgi satylarynyń jerebesi tartylǵanyn habarlaǵan edik.
