Fýtzaldan Eýropa birinshiligi: Qazaqstan jerebe rásiminde 1-sebette bolady
NUR-SULTAN. QazAqparat - Fýtzaldan Qazaqstan quramasy EÝRO-2022 fınaldyq satysynyń jerebe tartý rásiminde birinshi sebette bolady, dep habarlaıdy QazAqparat tilshisi UEFA saıtyna silteme jasap.
Qurlyqtyq doda 2022 jyldyń 19 qańtary men 6 aqpany aralyǵynda Nıderlandynyń Amsterdam jáne Gronıngen qalalarynda ótkiziledi. Onda barlyǵy 16 qurama baq synaıdy.
Quramalar tórt topqa bólinip, ózara synǵa túsedi. Árbir toptan alǵashqy eki orynǵa ıe bolǵan quramalar jarystyń kelesi satysyna joldama alady.
Qazir quramalar tórt sebetke bólingen. Alǵashqysynda Ispanııa, Reseı, Portýgalııa, Qazaqstan ornalassa, ekinshisinde Horvatııa, Ázerbaıjan, Serbııa nemese Belarýs, Italııa jaıǵasqan. Al úshinshisinde Ýkraına, Slovenııa, Bosnııa jáne Gertsegovına, Polsha bolsa, tórtinshi sebette Fınlıandııa, Slovakııa, Grýzııa, Nıderlandy bar.
Aıta keteıik, jerebe tartý rásimi 18 qazan kúni ótedi.
Qazaqstandyq fýtzalshylar Eýropa birinshiliginde 2016 jyly alǵash ret qatysty. Sol jyly toptyq kezeńde Reseıden 1:2 esebimen jeńilip, Horvatııadan 4:2 esebimen basym tústi. Odan keıin shırek fınalda Italııany 5:2 esebimen súrindirdi. Jartylaı fınalda Ispanııaǵa 3:5 esebimen jol berdi. Al 3-oryn úshin saıysta Serbııany 5:2 esebimen jeńip, qola júldeger atandy.
2018 jylǵy qurlyqtyq dodada B tobynda Polshany 5:1 esebimen jeńse, Reseımen 1:1 esebine qanaǵat bildirdi. Al shırek fınalda Serbııadan 3:1 esebimen aılasyn asyrdy. Jartylaı fınalda Ispanııamen negizgi kezeńde 5:5 esebimen teń oınap, penaltıden 1:3 esebimen ese jiberdi.
Eske salsaq, Qazaqstan quramasy bıyl ótken álem chempıonatynda tórtinshi oryn aldy.
