Fýtzaldan el quramasy álem chempıonaty irikteý kezeńin jeńispen bastady
ASTANA. KAZINFORM — Fýtzaldan Qazaqstan quramasy 2028 jylǵy álem chempıonaty negizgi irikteý kezeńinde elordada Belarýsten basym tústi.
Kezdesý barysynda alǵashqy goldy belarýstik oıynshylar soqty. Odan keıin qazaqstandyq qurama tizgindi óz qolynda ustap, birneshe goldy soǵyp úlgerdi. Aldymen 9-mınýtta otandasymyz Albert Aqbalyqov penaltıden múlt ketpese, odan keıin Edson 10, 14, 28-mınýtta qatarynan úsh gol soǵyp úlgerdi.
Al 31-mınýtta belarýstik oıynshylar esep aıyrmasyn qysqartsa, odan keıin qazaqstandyq qaqpashy Igıta qaıtadan basymdyqty arttyrdy.
Oıynnyń 40-mınýtynda Belarýs quramasy taǵy eki gol soǵyp ketti.
Osylaısha, otandastarymyz qarsylasynan 5:4 esebimen basym tústi.
Jerebe qorytyndysy boıynsha Qazaqstan quramasy 6-topqa túsip, Belarýs jáne Albanııa quramalarymen kezdesedi.
Endi otandastarymyz 11 qarashada syrt alańda Belarýspen kezdesse, 9 jeltoqsan men 2027 jyldyń 2 naýryzynda Albanııamen eki oıyn ótkizedi.
Negizgi raýnd matchtary 2026 jylǵy 12-21 qazan, 2-11 qarasha, 6-9 jeltoqsan aralyǵynda jáne 2027 jylǵy 22 aqpan men 3 naýryz aralyǵynda ótedi.
Negizgi kezeńniń qorytyndysy boıynsha barlyq 12 toptyń jeńimpazy men ekinshi oryn alǵan úzdik tórt qurama elıtalyq raýndqa tikeleı joldama alady. Al ekinshi oryn ıelengen qalǵan segiz komanda pleı-off kezeńinde álem chempıonatynyń kelesi satysyna shyǵý úshin kúresin jalǵastyrady.
Qazirge deıin fýtzaldan Qazaqstan quramasy álem chempıonaty fınaldyq kezeńine tórt márte qatysty. Ázirshe eń joǵary jetistigi — 2021 jylǵy tórtinshi oryn.
