Fýtzaldan Chempıondar lıgasy: «Qaırat» jáne «Aıat» elıtalyq kezeńge joldama aldy
NUR-SULTAN. QazAqparat - Qazaqstandyq «Qaırat» jáne «Aıat» klýbtary fýtzaldan UEFA Chempıondar lıgasy elıtalyq kezeńine joldama aldy, dep habarlaıdy QazAqparat tilshisi.
«Qaırat» jarystyń negizgi kezeńinde tórtinshi topta synǵa tústi. Olar alǵashqy eki kezdesýde Reseıdiń KPRF komandasynan 0:3, odan keıin Ispanııanyń «Mýrsııa» klýbynan 2:3 esebimen jeńilip qaldy. Jarys erejesi boıynsha árbir toptan alǵashqy úsh oryndaǵy komandalar týrnırdiń kelesi satysyna joldama alatyn edi. Nátıjesinde «Qaırat» sońǵy oıynda búgin Vengrııanyń «Berettoýıfal» klýbyn 3:0 esebimen tize búktirdi. Osylaısha jarysty jalǵastyrýǵa múmkindik aldy.
UEFA Chempıondar lıgasynda bıyl tuńǵysh ret baq synaǵan Rýdnyıdyń «Aıat» klýby da atalmysh týrnırdiń elıtalyq kezeńinde el namysyn qorǵaıdy. «Aıat» alǵashqy kezdesýinde Lıtvanyń «Vıtısinen» 5:4 esebimen basym túsip, odan keıin Ispanııanyń «Barselonasynan» 1:7 esebimen jeńildi. Búgin olar Reseıdiń «Tıýmen» komandasyna 3:8 esebimen jol berdi. Nátıjesinde úshinshi topta alǵashqy úshtikten kórinip, jarysty jalǵastyrýǵa múmkindik aldy.
UEFA Chempıondar lıgasy elıtalyq kezeńi 19-24 qarasha kúnderi ótkiziledi. Al fınaldyq satysy 2020 jyldyń 23-26 sáýir kúnderi bolady dep kútilýde.
