Fýtzaldan Chempıondar lıgasy: «Qaırat» pen «Aıattyń» qarsylastary anyqtaldy
NUR-SULTAN. QazAqparat - Fýtzaldan ÝEFA Chempıondar lıgasynda synǵa túsetin Almatynyń «Qaıraty» men Rýdnyıdyń «Aıat» komandalarynyń qarsylastary anyqtaldy, dep habarlaıdy QazAqparat tilshisi.
Jerebe tartý rásimi Shveıtsarııanyń Non qalasynda 4 shilde kúni ótkizildi. Esterińizge sala ketelik, elimizdiń atynan synǵa túsetin eki klýb ta atalmysh týrnırdiń negizgi kezeńinen bastap qatysady. Onda barlyǵy 32 klýb sheberlik baıqasady.
«Aıat» komandasy úshinshi topqa tústi. Qarsylastary - Ispanııanyń «Barselona», Reseıdiń «Tıýmen» jáne Lıtvanyń «Vıtıs» klýbtary. Bul toptaǵy oıyndar Lıtvada ótkiziledi.
Almatynyń «Qaıraty» tórtinshi topta baq synaıdy. Almatylyq klýb Ispanııanyń «Mýrsııa», Reseıdiń KPRF jáne Vengrııanyń «Berettoýıfalý» komandalarymen sheberlik baıqasady.
Negizgi kezeń oıyndary 8-13 qazan kúnderi ótkiziledi. Árbir toptan úzdik shyqqan úsh komanda jarystyń elıtalyq kezeńine joldama alady.
«Qaırat» komandasy byltyr Chempıondar lıgasynyń fınalyna deıin jetti. Fınalda Portýgalııanyń «Sportıng» (Lıssabon) klýbyna jol berip qoıdy. Olar ÝEFA kýbogynda (qazirgi ÝEFA Chempıondar lıgasy) 2012/2013, 2014/2015 jylǵy kezeńde bas júldege ıe boldy. Al «Aıat» byltyr el birinshiliginde kúmis júldeger atanyp, ÝEFA Chempıondar lıgasynda tuńǵysh ret baq synaǵaly otyr.
Aıta keterligi, atalmysh týrnırde Qazaqstannan basqa Ispanııa, Portýgalııa jáne Reseı elderinen ǵana eki-ekiden komanda qatysady.
