Fýtzaldan Chempıondar lıgasy: «Qaırat» maltalyq klýbpen teń tústi

ASTANA. QazAqparat - Fýtzaldan Chempıondar lıgasynyń elıtalyq satysynda qazaqstandyq «Qaırat» Maltanyń «Lıýksol Sent-Endrıýs» komandasymen kezdesti, dep habarlaıdy QazAqparat tilshisi.

Komandalar S tobynda synǵa túsedi. Almaty qalasynda ótip jatqan atalǵan top oıyndarynda olardan ózge «Hrýdım» (Chehııa) jáne «Benfıka» (Portýgalııa) baq synaýda.

Kezdesý barysynda komandalar bir-biriniń qaqpasynan gol soǵatyn múmkindik izdedi. Degenmen birinshi kezeńde tablodaǵy esep ózgergen joq.

Ekinshi kezeńde «Qaırat» oıyn tizginin óz qolyna alýǵa tyrysty. Alaıda jankúıerler soǵylǵan goldy kóre alǵan joq.

Kezdesý 0:0 esebimen teń aıaqtaldy.

Endi almatylyq klýb aldaǵy oıynyn erteń, 24 qarashada «Hrýdım» komandasyna qarsy ótkizedi.

Chehııalyq klýb búgin Portýgalııanyń «Benfıka» komandasymen 3:3 esebimen teń tústi.

Oıyndar 22-27 qarasha aralyǵynda ótedi. Árbir toptyń jeńimpazy týrnırdiń bas júldesin sarapqa salatyn tórt komanda qataryna qosylady.

Almatylyq klýb týrnırdiń negizgi satysynda óz tobynda úshinshi oryn aldy. Jarys barysynda frantsııalyq «Sportıng Parıjdi» 3:2 esebimen jeńse, belgııalyq «Halle-Gooık» jáne ıspanııalyq «Palmamen» 2:2 esebimen teń tústi.