Fýtzaldan Chempıondar lıgasy: «Qaırat» «Barselonadan» alǵash ret jeńildi
NUR-SULTAN. QazAqparat - Fýtzaldan UEFA Chempıondar lıgasynyń jartylaı fınalynda Almatynyń «Qaıraty» Ispanııanyń «Barselona» komandasymen kezdesti, dep habarlaıdy QazAqparat tilshisi.
Búgingi kezdesýde ıspanııalyq klýb oıynshylary tizgindi qolǵa alýǵa tyrysty. «Qaırattyń» negizgi qaqpashysy Igıta shırek fınaldaǵy «Benfıka» komandasymen kezdesýde alǵan «qyzyl» qaǵazyna baılanysty bul oıynnan shettetildi. Onyń ornyn 19 jastaǵy Narýn Serikov almastyrdy. Ol oıyn barysynda kóptegen sátterde ózine senimdi kórindi.
Dese de Eýropa qurlyǵynda tájirıbeli klýbtyń biri sanalatyn «Barselona» alǵashqy bolyp esep ashty. Atap aıtqanda, 15-mınýtta Ferrao mergendik tanytsa, 20-mınýtta esepti ústemeleı tústi. Budan keıin 24-mınýtta «Qaırat» sapynan Dıego Favero esep aıyrmasyn qysqartty. Al 32-mınýtta Ferrao het-trık avtory atansa, 35-mınýtta qazaqstandyq klýb sapynan Fernandıno kózdegen nysanadan múlt ketken joq.
Kezdesý barysynda «Barselona» 3:2 esebimen jeńip, fınalǵa joldama aldy. Ispandyq klýb 3 mamyrda fınalda Portýgalııanyń «Sportıng» komandasymen kezdesedi.
Esterińizge sala ketelik, budan buryn atalǵan týrnırde komandalar úsh márte kezdesti. Úsheýinde de qazaqstandyq klýbtyń mereıi ústem bolǵan edi.
