Fýtzaldan Chempıondar lıgasy: «Qaırat» syrt alańda «Anderlehtti» jeńdi

ASTANA. KAZINFORM - Qazaqstandyq «Qaırat» UEFA Chempıondar lıgasy elıtalyq kezeńindegi alǵashqy oıynyn ótkizdi.

Almatylyq komanda bul joly syrt alańda Belgııanyń «Anderleht» klýbymen sheberlik baıqasty.

Kezdesý bastalǵan sátten qazaqstandyq klýb jyldam gol soǵyp úlgerdi. Bul goldy 1-mınýtta Kaıo Rýız óziniń enshisine jazdy. Kóp uzamaı oǵan belgııalyq komanda úsh golmen jaýap berdi. Olardyń qatarynan Ranjel 2, Grello 3-mınýtta mergendik tanytsa, 10-mınýtta Erık Fanes kózdegen nysanadan múlt ketken joq.

Óz qaqpasyna qatarynan úsh gol jiberip alǵan almatylyq komanda birinshi kezeń bitkenge deıin tarazy basyn teńestirip úlgerdi. Ony Atırson Sılva 11, Lýkas Otanıa 12-mınýtta óziniń enshisine jazdy.

Ekinshi kezeńde almatylyq klýb oıyn basynda qatarynan eki gol soqty. Komanda sapynan Dáýren Tursaǵulov 21, Atırson Sılva 26, Birjan Orazov 29-mınýtta kózge tústi.

Al Lýkas Otanıa «Anderleht» komandasynyń bos qalǵan qaqpasyna gol soǵyp, qorytyndy esepti belgiledi.

Osylaısha «Qaırat» qarsylasynan 7:3 esebimen basym tústi.

Aıta ketsek, almatylyq klýb negizgi kezeńde tórtinshi topta Kosovonyń «Prıshtına» komandasyn 4:1, horvatııalyq «Novo Vrıemeni» 3:2 esebimen tize búktirse, Portýgalııanyń «Sportıngten» 2:7 esebimen jeńilip qaldy

Endi komandalar 5 jeltoqsanda Almatyda qarymta kezdesý ótkizedi.

Aıta ketsek, qazaqstandyq «Semeı» jarystyń atalǵan satysynda óz alańynda Polshanyń «Pıast» klýbymen 3:3 esebimen teń tústi.