Fýtzaldan Chempıondar lıgasy: «Qaırat» shırek fınalda qaı komandamen kezdesedi

ASTANA. KAZINFORM – Almatynyń «Qaırat» klýby fýtzaldan Chempıondar lıgasynyń shırek fınalynda qaı komandamen kezdesetini belgili boldy, dep habarlaıdy Sports.kz.

1/4 fınalda «Qaırat» Ispanııanyń «Kartahena» klýbymen oınaıdy. Ispanııalyq komanda eki kezdesýdiń qorytyndysy boıynsha Maltanyń «Sent-Endrıýs» klýbyn 14:2 esebimen oısyrata jeńdi.

Alǵashqy matchta «Kartahena» syrt alańda 9:1 esebimen basym tústi, al qarymta kezdesýde óz alańynda taǵy da 5:1 nátıjesimen aıqyn jeńiske jetti.

«Qaırat» 1/8 fınalda Belgııanyń «Sportıng-Anderleht» klýbyn jarys jolynan shyǵardy.

Brıýsselde ótken alǵashqy oıynda almatylyqtar 7:3 esebimen jeńiske jetse, Almatydaǵy jaýapty matchta taǵy da 5:3 esebimen basym tústi.

Aldaǵy shırek fınaldyq kezdesý komandanyń bıylǵy maýsymdaǵy eń mańyzdy matchtarynyń biri bolmaq.

Aıta keteıik, buǵan deıin «Semeı» fýtzaldan Chempıondar lıgasynyń kelesi satysyna shyqqanyn jazǵan bolatynbyz.