Fýtzaldan Chempıondar lıgasy: «Qaırat» «Prıshtına» komandasyn iri eseppen jeńdi

Fýtzaldan «Qaırat» komandasy búgin Chempıondar lıgasy elıtalyq satysyndaǵy alǵashqy oıynynda Kosovonyń «Prıshtına» komandasyn iri eseppen jeńdi, dep habarlaıdy Kazinform.

Oıynnyń birinshi kezeńinde qazaqstandyq komanda belsendiligin kórsetti. Almatylyq klýb sapynan Albert Aqbalyqov 5-mınýtta avtogol avtory atandy.

Odan keıin «Qaırat» oıynshylary qatarynan jeti gol soqty.

Bul goldardy Pedro 7, 18, Neves de Lıma 8, Dıego Favero 9, 17, Dener 12, Edson Santos 13-mınýtta óziniń enshisine jazdy.

Ekinshi kezeń bastalǵannan kosovolyq fýtbolshylar alǵa qaraı umtyldy. Nátıjesinde 24-mınýtta olar esep aıyrmasyn qysqartqan edi.

Qazaqstandyq komanda odan ári tizgindi óz qolyna aldy.

Olardyń qatarynan Dener 27, Dýglas Jýnıor 29, Aleks Vıana 29, Kaıo Rýıs 30 kosovolyq qaqpashyny birneshe márte qapy qaldyrdy.

Osylaısha «Qaırat» qarsylasynan 11:2 esebimen basym tústi.

Endi «Qaırat» 30 qarasha 22:00-de Portýgalııanyń «Benfıka», 2 jeltoqsanda Slovakııanyń «Dobovets» klýbymen oınaıdy.

Sondaı-aq, atalǵan topta «Benfıka» «Dobovetsten» 4:3 esebimen basym tústi.

Aıta ketsek, almatylyq klýb 2012/2013, 2014/2015 jyldarda atalǵan týrnırde jeńimpaz atanǵan edi.