Fýtzaldan Chempıondar lıgasy: «Qaırat» pen «Semeı» 1/4 fınaldaǵy alǵashqy oıynyn ótkizedi

ASTANA. KAZINFORM – 23 aqpanda fýtzaldan UEFA Chempıondar lıgasynyń 1/4 fınaldyq kezeńinde qazaqstandyq «Qaırat» pen «Semeı» komandalary alǵashqy oıyndaryn ótkizedi. 

Almatylyq komanda saǵat 20:00-de óz alańynda Ispanııanyń «Kartahenasymen» kezdesse, 00:30-da semeılik klýb syrt alańda Frantsııanyń «Nıtstsa» klýbymen sheberlik baıqasady. Eki kezdesý de «Qazsport» telearnasynan tikeleı efırde kórsetiledi.

Aıta ketsek, 1/8 fınalda «Qaırat» Belgııanyń «Anderleht» klýbyn (7:3, 5:3) qapy qaldyrsa, «Semeı» Polshanyń «Pıast» komandasyn (3:3, 5:3) jeńip, kelesi kezeńge shyqty. 

Bıyl fýtzaldan Chempıondar lıgasynyń elıtalyq kezeńine ózgerister engizildi. Jarystyń atalǵan satysynda 16 komanda segiz jupqa bólindi. Komandalar 2025 jyldyń 24 qarasha-6 jeltoqsan aralyǵynda óz alańynda jáne syrt alańda bir-bir kezdesýden ótkizdi.

Endi 2026 jyldyń 23 aqpany men 6 naýryzy aralyǵynda komandalar sol ereje boıynsha shırek fınalda synǵa túsedi. Fınal 2026 jyldyń mamyr aıynda Italııanyń Pesaro qalasynda ótedi. Onda tórt komanda sheberlik baıqasady. Aldymen jartylaı fınal bolsa, odan keıin fınal men 3-oryn úshin oıyndar ótkiziledi.