Fýtzaldan Chempıondar lıgasy: «Qaırat» birinshi oıynyn jeńdi

Fýtzaldan qazaqstandyq «Qaırat» klýby Chempıondar lıgasynyń negizgi satysynda alǵashqy oıynyn búgin Lıýksembýrgtiń «Dıfferdanj» komandasyna qarsy ótkizdi, dep habarlaıdy Kazinform.

«Qaırat» úshinshi topta Ispanııanyń «Palma», Vengrııanyń «Haladash» jáne Lıýksembýrgtiń «Dıfferdanj» komandalarymen kezdesedi.

Almatylyq klýb «Dıfferdanjben» búgingi matchta alǵashqy mınýttan shabýylǵa kóńil bóldi.

Oıynnyń 6-mınýtynda olardyń qatarynan Dáýren Tursaǵulov esep ashsa, 10-mınýtta Dennıs esepti ústemeleı tústi.

Oǵan «Dıfferdanj» oıynshysy Rýben Reıs 11-mınýtta bir golmen jaýap qaıyrdy.

13-mınýtta almatylyq klýb sapynan Neves de Lıma óz komandasynyń basymdyǵyn arttyrdy.

Ekinshi kezeńde lıýksembýrgtik fýtzalshylar esep aıyrmasyn qysqarta aldy. Alaıda, Neves de Lıma 39-mınýtta qorytyndy esepti belgiledi.

Osylaısha «Qaırat» qarsylasynan 4:2 esebimen basym tústi.

Endi almatylyq klýb 27 qarashada Vengrııanyń «Haladash» komandasymen kezdesedi.

Eske salsaq, qazaqstandyq «Aıat» Chempıondar lıgasyndaǵy ekinshi oıynynda Portýgalııanyń «Sportıng» komandasynan jeńildi.

Ár toptan alǵashqy úsh oryndaǵy komandalar elıtaly satyǵa joldama alady. Ol oıyndar bıylǵy 28 qarasha - 3 jeltoqsan aralyǵynda ótedi.