Fýtzaldan Brazılııa quramasy álem chempıonatynyń fınalyna shyqty
ASTANA. KAZINFORM - Fýtzaldan Brazılııa quramasy álem chempıonatynyń fınalyna joldama aldy.
Jartylaı fınaldyq oıynnyń birinshi kúninde Ýkraına men Brazılııa quramalary sheberlik baıqasty. Jankúıerlerdiń basym bóligi buǵan deıin bes dúrkin álem chempıony bolǵan brazılııalyq fýtzalshylar qarsylasyn ońaı jeńedi dep boljaǵan edi. Degenmen kezdesý barysynda Ýkraına quramasy olarǵa laıyqty toıtarys bere bildi.
Oıyn basynan qos qurama birden shabýylǵa kóńil bóldi. Nátıjesinde ýkraınalyq Igor Chernıavskıı 18-mınýtta mergendik tanytyp, óz quramasyn alǵa shyǵardy. Brazılııalyq fýtzalshylar odan keıin tarazy basyn teńestirýge umtyldy. Dese de birinshi kezeńde tablodaǵy esepke ózgeris engen joq.
Ekinshi kezeńde brazılııalyqtar jyldam eki gol soǵyp ketti. Aldymen ýkraınalyq Rostıslav Semenchenko 21-mınýtta avtogol avtory atansa, 22-mınýtta Dıego mergendigimen kózge tústi. Al, ýkraınalyq Igor Korsýn 29-mınýtta esepti teńestirdi. Alaıda brazılııalyq fýtzalshy Dıego penaltı tebýge múmkindik alyp, komandasynyń jeńisti golyn soqty. Osylaısha qarsylasynan 3:2 esebimen basym túsken Brazılııa fınalǵa joldama aldy.
Endi 3 qazanda ekinshi jartylaı fınaldyq kezdesýde Frantsııa men Argentına kim myqtyny anyqtaıdy. Fınal men 3-oryn úshin oıyn 6 qazanǵa belgilengen.
Eske salsaq, budan buryn Qazaqstan quramasy shırek fınalda Argentınaǵa jol bergen edi.
