Fýtzaldan Álem chempıonatyna irikteý: Qazaqstan Chernogorııany jeńdi
ASTANA. QazAqparat - Fýtzaldan Qazaqstan quramasy 2024 jylǵy álem chempıonatyna irikteý kezeńindegi ekinshi oıynyn Chernogorııaǵa qarsy ótkizdi, dep habarlaıdy QazAqparat tilshisi.
Kezdesý barysynda qazaqstandyq quramadan Leo 1-mınýtta esep ashty. Oǵan chernogorııalyq Fılıp Markovıch 16-mınýtta bir golmen jaýap qaıyrdy. Al 18-mınýtta Edson qaıtadan Qazaqstan quramasyn alǵa shyǵardy.
Ekinshi kezeńde qazaqstandyq fýtzalshylar basymdyqty arttyra tústi. Oıynnyń 28-mınýtynda el quramasynan Arnold Knaýb mergendik tanytsa, arada 20 sekýnd ótkende qazaqstandyq Albert Aqbalyqov kózdegen nysanadan múlt ketken joq.
Kezdesýdiń 37-mınýtynda Taınan atalǵan oıyndaǵy óziniń ekinshi golyn soǵyp, qorytyndy esepti belgiledi.
Osylaısha elimiz fýtzalshylary qarsylasynan 5:1 esebimen basym tústi.
Eske salsaq, budan buryn Qazaqstan quramasy Slovenııany jeńgen bolatyn.
Al Chernogorııa Slovenııaǵa 1:3 esebimen jol berdi.
Eki oıynnan keıin upaı joǵaltpaǵan qazaqstandyq fýtzalshylar alty upaımen kósh basynda tur.
Endi el quramasy aldaǵy kezdesýinde 9 qarashada Chernogorııany qabyldaıdy.
