Fýtzaldan Álem chempıonatyna irikteý: Qazaqstan alǵashqy matchty jeńispen bastady
NUR-SULTAN. QazAqparat - Fýtzaldan Qazaqstan quramasy 2020 jylǵy Álem chempıonatynyń irikteý satysyn jeńispen bastady, dep habarlaıdy QazAqparat tilshisi.
Qazaqstandyq fýtzalshylar besinshi topta synǵa túsip jatyr. Olar búgin Albanııa quramasymen sheberlik baıqasty. Elimiz fýtbolshylary senimdi oıyn kórsetip, qarsylastar qaqpasyna jaýapsyz tórt gol soqty.
Aldymen 6-mınýtta qazaqstandyq Albert Aqbalyqov qarsylastar qaqpashysyn qapy qaldyryp ketken edi. Odan keıingi goldar kezdesýdiń ekinshi kezeńinde soǵyldy. Qazaqstandyqtar qatarynan Taınan 26-mınýtta esepti ulǵaıtsa, 31-mınýtta Dýglas mergendik tanytty. Qorytyndy esepti 37-mınýtta Dáýren Tursaǵulov belgiledi.
Osylaısha, Qazaqstan quramasy qarsylasyn 4:0 esebimen jeńip ketti.
Qazaqstandyqtar endi 24 qazanda Gollandııamen, 26 qazanda Rýmynııamen sheberlik baıqasady. Esterińizge sala ketelik, Álem chempıonatynyń fınaldyq kezeńi 2020 jyldyń 12 qyrkúıek - 4 qazany aralyǵynda Lıtvada ótedi. Onda barlyǵy 24 qurama synǵa túsedi.
Qazaqstan quramasy Álem chempıonatynda 2000, 2016 jyldarda baq synady. 2016 jyly shırek fınalǵa deıin jetken edi.
