Fýtzaldan Álem chempıonaty: Qazaqstan quramasy jeńisin jalǵastyrdy
NUR-SULTAN. QazAqparat - Búgin fýtzaldan Qazaqstan quramasy 2020 jylǵy Álem chempıonatynyń irikteý satysyndaǵy ekinshi kezdesýin Gollandııaǵa qarsy ótkizdi, dep habarlaıdy QazAqparat tilshisi.
Qazaqstan quramasy búgingi oıyndy óte senimdi bastady. Qarsylastar qaqpasyna birinshi kezeńniń ózinde eki gol soǵyp ketti. Alǵashqy goldy 1-mınýtta Dýglas Jýnıor óziniń enshisine jazsa, 15-mınýtta qazaqstandyq qaqpashy Igıta mergendik tanytty. Esep 2:0.
Qazaqstandyq fýtzalshylar ekinshi kezeńde de ózderiniń myqty ekenin dáleldeı tústi. Nátıjesinde qarsylastar qaqpasyna taǵy da úsh gol engizdi. Qazaqstandyq qurama sapynan 21 jáne 35 mınýttarda Dýglas Jýnıor eki goldyń avtory atanyp, kezdesý barysynda het-trık jasady. Osylaısha qazaqstandyq fýtzalshylar qarsylasynan 5:0 esebimen basym tústi.
Budan buryn Qazaqstan quramasy Albanııany 4:0 esebimen tize búktirgen edi. Osylaısha qazaqstandyq fýtzalshylar ázirge eki oıynda óz qaqpasyna birde-bir gol jibergen joq. Keshe Gollandııa men Rýmynııa quramalary 1:1 esebimen teń oınady.
Ázirge Qazaqstan eki oıynnan keıin 6 upaı jınap, týrnır kestesinde jeke-dara kósh bastap tur. Sondaı-aq, búgin atalmysh topta Rýmynııa men Albanııa quramalary sheberlik baıqasady.
Álem chempıonaty fınaldyq satysy 2020 jyldyń 12 qyrkúıek - 4 qazan aralyǵynda Lıtvanyń Vılnıýs, Kaýnas jáne Klaıpeda qalalarynda ótkiziledi. Onda jarys qojaıyny - Lıtvamen birge Eýropadan segiz qurama baq synaıdy. Sondaı-aq, Azııadan - 5, Afrıkadan - 3, Soltústik Amerıkadan - 4, Ońtústik Amerıkadan -3, muhıt aımaǵynan -1 qurama qatysýǵa múmkindik alady.
Foto:kff.kz
