Fýtzaldan álem chempıonaty: Qazaqstan Chernogorııany 7:0 esebimen jeńdi
ASTANA. QazAqparat - Fýtzaldan Qazaqstan quramasy búgin álem chempıonatynyń ekinshi irikteý satysyndaǵy kezekti oıynyn Chernogorııaǵa qarsy ótkizdi, dep habarlaıdy QazAqparat tilshisi.
Kezdesý barysynda qazaqstandyq fýtzalshylar senimdi oıyn kórsetti.
Nátıjesinde birinshi kezeńde el quramasynan Jýnıor Dýglas 1-mınýtta esep ashsa, Abdırasýl Ábdimanapuly – 3, Arnold Knaýb 14-mınýttarda esepti ústemeleı tústi.
Ekinshi kezeńde Albert Aqbalyqov 21-mınýtta mergendik tanytsa, Birjan Orazov 24 jáne 25-mınýttarda kózdegen nysanadan múlt ketken joq. Oıyn núktesin Azat Valıýllın 39-mınýtta qoıdy.
Osylaısha el fýtzalshylary qarsylasynan 7:0 esebimen basym tústi.
QR quramasy besinshi topta synǵa túsedi. Qarsylastary - Slovenııa men Chernogorııa.
Buǵan deıin qazaqstandyq fýtzalshylar óz alańynda Slovenııany 2:0 esebimen tize búktirse,syrt alańda Chernogorııany 5:1 esebimen jeńdi.
Óz tobynda toǵyz upaımen birinshi oryn alǵan Qazaqstan quramasy bir týr buryn úshinshi irikteý kezeńine joldama aldy.
Endi quramamyz 2023 jyldyń 8 naýryzynda Slovenııamen syrt alańda taǵy bir márte kezdesedi.
Fýtzaldan Qazaqstan quramasy álem chempıonatynyń fınaldyq satysynda 2000, 2016, 2021 jyldarda synǵa túsip, 2021 jyly tórtinshi orynǵa taban tiregen edi.
Foto: sports.kz
