Fýtzaldan álem chempıonaty: Búgin Qazaqstan quramasy Lıtvamen kezdesedi
NUR-SULTAN. QazAqparat - Búgin fýtzaldan álem chempıonatynyń fınaldyq satysy toptyq kezeńindegi ekinshi oıynynda Qazaqstan quramasy Lıtvamen kezdesedi, dep habarlaıdy QazAqparat tilshisi.
Lıtva quramasy buǵan deıin álem chempıonaty fınaldyq satysynda baq synap kórgen emes. Bıyl dúbirli dodany ótkizetin el retinde úzdikter qataryna qosyldy.
Atalǵan oıyn elorda ýaqytymen 23:00-de bastalyp, «Qazsport» telearnasynan tikeleı efırde kórsetiledi.
Qazaqstandyq fýtzalshylar A tobynda synǵa túsedi. Qarsylastary - Lıtva, Venesýela, Kosta-Rıka.
Alǵashqy kezdesýinde qazaqstandyq fýtzalshylar Kosta-Rıkadan 6:1 esebimen basym tústi.
Al Lıtva Venesýelaǵa 1:2 esebimen jol berdi.
Qazaqstandyqtar budan keıin úshinshi týrda 18 qyrkúıekte Venesýelamen sheberlik baıqasady.
Álem chempıonatynda barlyǵy 24 qurama baq synaıdy. Fınal 3 qazanǵa belgilengen.
Qazaqstan quramasy budan buryn álem chempıonaty fınaldyq satysynda eki márte baq synady.
2000 jyly birinshi kezeńnen asa almasa, 2016 jyly 1/8 fınalǵa deıin jetti.
