Fýtzaldan álem chempıonaty: Argentına fınalǵa shyqqan alǵashqy qurama atandy
NUR-SULTAN. QazAqparat - Fýtzaldan álem chempıonatynyń fınalyna shyqqan alǵashqy qurama anyqtaldy, dep habarlaıdy QazAqparat tilshisi.
Jartylaı fınaldaǵy alǵashqy jupta Brazılııa men Argentına sheberlik baıqasty.
Ekeýi de fýtzal áleminde bedeli joǵary quramalar. Sondyqtan jankúıerler atalǵan kezdesýden tartysty oıyn kútti. Kezdesý barysy dál solaısha órbidi.
Birinshi kezeńde argentınalyqtar sapynan Konstantıno Vaporakı 11, Krıstıan Borrýto 13-mınýttarda mergendik tanytty. Oǵan brazılııalyq quramadan Ferrao 17-mınýtta bir golmen jaýap qaıyrdy.
Osylaısha Argentına qarsylasyn 2:1 esebimen tize búktirip, fınalǵa joldama aldy. Oǵan 30 qyrkúıekte ótetin jartylaı fınaldaǵy Qazaqstan men Portýgalııa jubynyń jeńimpazy qarsylas atanady.
Aıta keteıik, Argentına 2016 jyly álem chempıony ataǵyn jeńip alǵan bolatyn. Al Brazılııa 5 márte altynnan alqa taqty.
Sondaı-aq, mundaı ataqqa Ispanııa eki márte ıe boldy.
Qazaqstan quramasy budan buryn álem chempıonatynyń fınaldyq satysynda eki márte baq synaǵan edi. 2000 jyly birinshi kezeńnen asa almasa, 2016 jyly 1/8 fınalǵa deıin jetti.
Álem chempıonatynyń fınaly 3 qazanǵa belgilengen.
