Fýtzaldan álem chempıonatynda Brazılııa eki oıynda 18 gol soqty

ASTANA. KAZINFORM — Keshe, 16 qyrkúıekte Ózbekstanda ótip jatqan fýtzaldan álem chempıonatynda ekinshi týrdyń alǵashqy oıyn kúni máresine jetti.

V tobynda synǵa túsip jatqan brazılııalyq fýtzalshylar bul kúni taǵy da iri jeńiske jetti. 

Qazirge deıin bes dúrkin álem chempıony ataǵyn jeńip alǵan qurama bıyl sol jetistigin qaıtalaýǵa tyrysady. Olar bul joly Horvatııany 8:1 esebimen súrindirdi. Atalǵan qurama buǵan deıin Kýbany 10:0 esebimen tize búktirgen edi.

Osylaısha olar eki oıynda 18 gol soǵyp, joǵary nátıje kórsetip otyr. 

Eki kezdesýde upaıdan shashaý shyǵarmaǵan brazılııalyqtar pleı-off satysyna shyǵý máselesin erterek sheship qoıdy. Al qatarynan eki márte jeńilistiń aşy dámin tatqan Horvatııa týrnır kestesindegi jaǵdaıyn birshama qıyndatyp aldy. 

Atalǵan topta Taıland quramasy Kýbany 10:5 esebimen jeńdi. Taılandtyq fýtzalshylar da eki oıynda alty upaı jınap, jarysty jalǵastyrýǵa múmkindik alyp otyr.

Al A tobynda Kosta-Rıka men Nıderland 2:2 esebimen teń oınasa, Ózbekstan quramasy Paragvaıǵa 1:4 esebimen jeńilip qaldy.

Endi 18 qyrkúıekte S tobynda Angola men Ýkraına, Argentına men Aýǵanstan, D tobynda Lıvııa men Qazaqstan, Ispanııa men Jańa Zelandııa sheberlik baıqasady.

Eske salsaq, budan buryn fýtzaldan álem chempıony atanǵan Portýglaııa quramasy Panamanyń qaqpasyna 10 gol saldy.