Fýtzaldan álem chempıonaty qazaqstandyq qaı telearnadan kórsetiledi

ASTANA. KAZINFORM - Fýtzaldan Qazaqstan quramasy qatysatyn álem chempıonatynyń oıyndary qaı telearnadan kórsetiletini belgili boldy. 

Jahandyq doda 14 qyrkúıek pen 6 qazan aralyǵynda Ózbekstanda ótedi. El quramasy D tobynda Ispanııa, Lıvııa jáne Jańa Zelandııamen sheberlik baıqasady. Oıyndar «Qazsport» telearnasy arqyly tikeleı efırde kórsetiledi.

Atalǵan synda el namysyn qorǵaıtyn Qazaqstan quramasynyń tizimi belgili boldy. Atap aıtqanda, Narýn Serikov, Leonardo Igıta, Arnold Knaýb, Rınat Tóreǵazın, Aqjol Dáribaı, Ábdirasýl Ábdimanapuly, Azat Valıýllın, Leo, Albert Aqbalyqov, Shyńǵys Esenamanov, Birjan Orazov, Dáýren Tursaǵulov, Jahangır Rashıt jáne Dýglas Jýnıor óner kórsetedi. 

Quramalardyń toptarǵa bólinisi tómendegideı:

A toby: Ózbekstan, Nıderland, Paragvaı, Kosta-Rıka

V toby: Brazılııa, Kýba, Horvatııa, Taıland

S toby: Argentına, Ýkraına, Aýǵanstan, Angola.

D toby: Ispanııa, Qazaqstan, Jańa Zelandııa, Lıvııa.

E toby: Portýgalııa, Tájikstan, Marokko, Panama.

F toby: Iran, Venesýela, Frantsııa, Gvatemala.

Qazaqstan quramasy álem chempıonatynyń fınaldyq satysynda 2000, 2016, 2021 jyldarda synǵa túsip, 2021 jyly 4-orynǵa taban tiredi. 

Eske salsaq, fýtzaldan Qazaqstan quramasy Ózbekstanǵa kelip jetti.