Fýtzaldan ÁCh: Qazaqstan quramasy elıtalyq satyda qalaı oınaıdy
NUR-SULTAN. QazAqparat - Búgin fýtzaldan Qazaqstan quramasy Chehııada álem chempıonaty elıtalyq kezeńinde alǵashqy oıynyn Rýmynııaǵa qarsy ótkizedi, dep habarlaıdy QazAqparat tilshisi.
Qazaqstan quramasy 23-31 qańtar aralyǵynda Nur-Sultan qalasynda oqý-jattyǵý jıynyn ótkizdi. Daıyndyq aıaqtalǵannan keıin qurama 2020 jylǵy álem chempıonaty elıtalyq kezeńindegi oıyndardy ótkizý maqsatynda Chehııaǵa attandy. Onda Rýmynııa, Slovenııa jáne Chehııamen kúsh synasady. Jarystyń elıtalyq satysy 2-5 aqpan aralyǵynda bolady.
Búgin Qazaqstan quramasy Rýmynııamen alańǵa shyǵady. Eki qarsylas jarystyń negizgi irikteý kezeńinde kezdesti. Onda qazaqstandyq fýtzalshylar 4:2 esebimen jeńiske jetti.
Rýmynııa búgingi kúnge deıin álem chempıonatynyń fınaldyq kezeńinde oıyn kórsetip kórgen emes. Esesine Eýropa chempıonatynda úsh márte baq synap úlgerdi. Alǵash 2007 jyly qurlyqtyq dodaǵa qatysqan olar toptyq kezeńnen árige asa alǵan joq. Odan keıin 2012, 2014 jyldarda shırek fınalǵa deıin jetti. Ázirge qol jetkizgen joǵary tabysy retinde osyndaı kórsetkishti aıtýǵa bolady.
Qazaqstan quramasy 3 aqpanda Slovenııamen sheberlik baıqasady. Olar álem chempıonaty fınaldyq kezeńinde birde-bir márte baq synap kórgen emes. Al Eýropa chempıonatyna 4 márte qatysyp, 2014, 2018 jyldarda shırek fınalǵa deıin jetti.
Al 5 aqpanda qazaqstandyq qurama Chehııamen kezdesedi. Chehtar álem chempıonaty fınaldyq kezeńine úsh márte qatysyp, 2004 jyly jarystyń ekinshi kezeńinde baq synady. Al Eýropa chempıonatynda 5 márte oınap, 2010 jyly qola júldeger atandy.
Qazaqstandyq fýtzalshylar búgingi kúnge deıin eki márte álem chempıonaty fınaldyq kezeńinde baq synap qaıtty. 2000 jyly qurama Azııa chempıonatynda fınalǵa deıin jetti. Nátıjesinde álem chempıonaty fınaldyq kezeńine joldama aldy. Degenmen ol joly qazaqstandyq oıynshylar sátsiz oıyn kórsetti. Toptyq kezeńde Brazılııadan 1:12, Portýgalııadan 2:6, Gvatemaladan 5:6 esebimen jeńilip, elge erterek qaıtýǵa májbúr boldy.
Odan keıin Qazaqstan fýtbol federatsııasy ÝEFA quramyna engeni belgili. Kári qurlyqtan qazaqstandyq qurama 2016 jylǵy álem chempıonatyna qatysýǵa joldama aldy. Álem chempıonaty fınaldyq kezeńinde Argentına, Kosta-Rıka jáne Solomon araldary quramalarymen bir topqa tústi. Nátıjesinde alǵashqy kezdesýde Argentınadan 0:1 esebimen jeńilgenimen kelesi oıyndarda Kosta-Rıkadan 3:1, Solomon araldarynan 10:0 esebimen basym tústi.
Esterińizge sala ketelik, álem chempıonatynyń fınaldyq kezeńi 2020 jyldyń 12 qyrkúıek - 4 qazan aralyǵynda Lıtvada ótedi. Onda barlyǵy 24 qurama synǵa túsedi.
Árbir topta jeńimpaz atanǵan tórt qurama týrnırdiń fınaldyq kezeńine tikeleı joldama alady. Al óz tobynda ekinshi oryn alǵan tórt qurama qosymsha eki joldamany sarapqa salady.
Qazaqstan jáne Rýmynııa quramalary arasyndaǵy kezdesý elorda ýaqytymen 01.50-de bastalady. Oıyn Qazaqstan fýtbol federatsııasynyń YouTube arnasynan kórsetiledi.
