Fýtzaldan ÁCh: Qazaqstan quramasy irikteý kezeńinde Belarýske ese jiberdi
ASTANA. KAZINFORM — Fýtzaldan Qazaqstan quramasy 2028 jylǵy álem chempıonaty negizgi irikteý kezeńinde syrt alańda Belarýspen kezdesý ótkizdi.
Oıyn barysynda belarýstik qurama jyldym gol soǵyp úlgerdi. Olardyń qatarynan 7-mınýtta Vladıslav Selıýk esep ashsa, odan keıin Alekseı Pınchýk 9, Vladıslav Shadýrka 13, Sergeı Krykýn 28, Sergeı Sınıtskıı 39-mınýtta mergendigimen kózge tústi.
Oǵan el quramasynan Rınat Tóreǵazın bir golmen jaýap qaıyrdy.
Osylaısha, Qazaqstan quramasy qarsylasyna 1:5 esebimen ese jiberdi.
Qazaqstan quramasy budan keıin 9 jeltoqsan men 2027 jyldyń 2 naýryzynda Albanııamen eki oıyn ótkizedi.
Aıta keteıik, irikteýdiń negizgi kezeńinde 36 ulttyq qurama baq synaıdy. Olar úsh quramadan 12 topqa bólindi. Matchtar úıde jáne syrt alańda ótedi.
Negizgi raýnd matchtary 2026 jylǵy 12-21 qazan, 2-11 qarasha, 6-9 jeltoqsan aralyǵynda jáne 2027 jylǵy 22 aqpan men 3 naýryz aralyǵynda bolady.
Negizgi kezeńniń qorytyndysy boıynsha barlyq 12 toptyń jeńimpazy men ekinshi oryn alǵan úzdik tórt qurama elıtalyq raýndqa tikeleı joldama alady. Al ekinshi oryn ıelengen qalǵan segiz komanda pleı-off kezeńinde álem chempıonatynyń kelesi satysyna shyǵý úshin kúresin jalǵastyrady.
Qazirge deıin fýtzaldan Qazaqstan quramasy álem chempıonaty fınaldyq kezeńine tórt márte qatysty. Ázirshe eń joǵary jetistigi — 2021 jylǵy tórtinshi oryn.
Eske salsaq, budan buryn Eki qurama arasynda elordada ótken alǵashqy matchta otandastarymyz 5:4 esebimen basym túsken edi.
