Fýtzaldan ÁCh: Qazaqstan Chehııany jeńip jatyr
NUR-SULTAN. QazAqparat - Fýtzaldan álem chempıonaty elıtalyq satysy toptyq kezeńindegi Chehııa jáne Qazaqstan quramalary arasyndaǵy kezdesýdiń birinshi kezeńi aıaqtaldy, dep habarlaıdy QazAqparat tilshisi.
Esterińizge sala ketelik, Qazaqstan búgin jeńiske jetken jaǵdaıda álem chempıonaty fınaldyq satysyna tikeleı joldama alady. Teń túsken nemese jeńilgen jaǵdaıda Chehııa dúbirli dodaǵa jol tartady.
Búgin birinshi kezeńniń alǵashqy mınýttarynda qazaqstandyq fýtzalshylar senimdi oınady. Nátıjesinde nebári tórt mınýt ishinde chehtar qaqpasyna úsh gol soǵyp úlgerdi. Alǵashqy eki goldy 3 jáne 4-mınýttarda Dýglas Jýnıor soqsa, sol 4-mınýtta Taınan esepti ústemeleı tústi. Budan keıin chehtar gol soǵý múmkindigin izdedi. Osylaısha Qazaqstan quramasy birinshi kezeńnen keıin qarsylasyn 3:0 esebimen jeńip jatyr.
Qazaqstandyq fýtzalshylar búgingi kúnge deıin eki márte álem chempıonaty fınaldyq kezeńinde (2000, 2016 jyldary) baq synap qaıtty.
Qazaqstan budan buryn Rýmynııadan 1:3 esebimen jeńilse, odan keıin Slovenııadan 4:3 esebimen basym tústi.
Búgin D tobynda taǵy bir kezdesý ótti. Rýmynııa men Slovenııa quramalary 4:4 esebimen teń tústi. Nátıjesinde dál qazir týrnır kestesinde Qazaqstan 6 upaımen top bastap tursa, dál sondaı upaımen Chehııa keledi. Jalǵyz joldama taǵdyry osy eki qurama arasynda anyqtalady. Al Rýmynııada 4, Slovenııada 1 upaı bar.
Esterińizge sala ketelik, álem chempıonatynyń fınaldyq kezeńi 2020 jyldyń 12 qyrkúıek - 4 qazan aralyǵynda Lıtvada ótedi. Onda barlyǵy 24 qurama synǵa túsedi. Árbir topta jeńimpaz atanǵan tórt qurama týrnırdiń fınaldyq kezeńine tikeleı joldama alady. Al óz tobynda ekinshi oryn alǵan tórt qurama qosymsha eki joldamany sarapqa salady.
