Fýtzal: Ulttyq quramada oınaıtyn sportshylar belgili boldy
NUR-SULTAN. QazAqparat - Fýtzaldan Qazaqstan quramasynyń elordada ótetin oqý-jattyǵý jıynyna shaqyrtý alǵan oıynshylar belgili boldy, dep habarlaıdy QazAqparat tilshisi Qazaqstan fýtbol federatsııasyna silteme jasap.
Oqý-jattyǵý jıyny 23-31 qańtar aralyǵynda Nur-Sultan qalasynda ótkiziledi. Daıyndyq aıaqtalǵannan keıin qurama 2020 jylǵy álem chempıonaty elıtalyq satysyndaǵy oıyndardy ótkizý maqsatynda Chehııaǵa attanady. Onda Rýmynııa, Slovenııa jáne Chehııamen kúsh synasady. Jarystyń elıtalyq satysy 2-5 aqpan aralyǵynda bolady.
Qazaqstan quramasynyń bas bapkeri Kaka oqý-jattyǵý jıynyna 16 oıynshyny shaqyrdy. Olardyń qatarynda qaqpashylar - Igıta («Qaırat»), Aleksandr Gýrov («Aıat»), Nurálem Baıdýlla («Jetisý»); oıynshylar - Dáýren Nurǵojın, Shyńǵys Esenamanov, Birjan Orazov, Dáýren Tursaǵulov, Albert Aqbalyqov, Nursultan Pııaly, Dýglas (barlyǵy - «Qaırat»), Azat Valıýllın («Aıat»), Dinmuhamed Súleımenov, Arnold Knaýb (ekeýi - «Jetisý»), Qaırat Imanalın («Aqtóbe»), Taınan, Leo (ekeýi - «Sportıng», Portýgalııa) syndy oıynshylar bar.
Árbir topta jeńimpaz atanǵan tórt qurama týrnırdiń fınaldyq satysyna tikeleı joldama alady. Al óz tobynda ekinshi oryn alǵan tórt qurama qosymsha eki joldamany sarapqa salady.
