Fýtzal: «Semeı» Chempıondar lıgasynyń elıtalyq kezeńine shyqty

ASTANA. KAZINFORM - Qazaqstandyq «Semeı» komandasy UEFA Chempıondar lıgasynyń negizgi kezeńindegi úshinshi oıynda «Palma» komandasyna ese jiberdi. 

Semeılik klýb bul kezeńde úshinshi topta synǵa túsip jatyr. Alǵashqy eki týrda olar horvatııalyq «Novo Vrıemeni» 3:2 esebimen jeńse, odan keıin Portýgalııanyń «Sportıngten» 2:7 esebimen jeńilip qaldy.

Ispanııalyq klýb osal qarsylas emes. Ótken maýsymda atalǵan týrnırde jeńimpaz bolǵan. Sondyqtan qazaqstandyq komanda úshin bul oıyn ońaıǵa soqpady.

Birinshi kezeńde ıspanııalyq klýb belsendi oıyn órnegin kórsetti. Nátıjesinde olardyń qatarynan Lýkas Mashado 2-mınýtta esep ashsa, semeılik klýbtan Kamıl Gereıhanov 5-mınýtta avtogoldyń avtory atandy. Odan keıin «Palma» sapynan Alısson 11, 18, 19-mınýtta het-trıktiń avtory bolsa, Lın 13-mınýtta kózdegen nysanadan múlt ketken joq. Oǵan semeılik klýbtan Marselo 10, Brýno Gomes 13-mınýtta eki golmen jaýap qaıyrdy.

Ekinshi kezeńde semeılik klýbtan Marselo 21-mınýtta esep aıyrmasyn qysqartsa, Gabrıel Kandıdo 31-mınýtta óz qaqpasyna gol soǵyp aldy. Al 33-mınýtta qazaqstandyq komandadan Brýno Gomes taǵy bir márte kózge tústi. Osylaısha «Semeı» fýtzal klýby qarsylasyna 4:7 esebimen ese jiberdi.

Alaıda bul topta 3 upaı jınaǵan «Semeı» úshinshi orynmen elıtalyq kezeńge joldama aldy.

Aıta ketsek, budan buryn almatylyq «Qaırat» klýby Kosovonyń «Prıshtına» komandasynan 4:1 esebimen basym tústi. Olar alǵashqy eki týrda horvatııalyq «Novo Vrıemeni» 3:2 esebimen jeńse, odan keıin Portýgalııanyń «Sportıngten» 2:7 esebimen jeńilip qaldy. Óz tobynda 6 upaımen ekinshi orynǵa taban tiregen «Qaırat» elıtalyq kezeńge shyqty.