Fýtzal: Portýgalııa tuńǵysh ret Eýropa chempıony atandy
ASTANA. QazAqparat - Slovenııada márege jetken fýtzaldan Eýropa chempıonatynyń fınalynda Ispanııa men Portýgalııa quramalary kúsh synasty, dep habarlaıdy «QazAqparat» tilshisi.
Ispanııa osyǵan deıin Eýropanyń jeti dúrkin chempıony atansa, Portýgalııa mundaı ataqqa qol jetkizbegen bolatyn. Sondyqtan eki komanda da baryn saldy. 1-mınýtta Portýgalııanyń kapıtany, álemniń úzdik oıynshylarynyń biri Rıkardınıý esep ashty. 19-mınýtta Ispanııa quramasynan Tolra tarazy basyn teńestirdi.
Ekinshi taımda aıyp núktesinen Mıgelınniń dál pasynan keıin Lın Ispanııany alǵa shyǵardy. Portýgalııalyqtar alty márte oıyn tártibin buzǵannan keıin olardyń qaqpasyna aıyp doby belgilendi. Alaıda Mıgelınniń tepken soqqysy qaqpa mańdaıshasynan keri qaıtty. Match bitýge jaqyndaǵanda, portýgalııalyqtar amalsyzdan qaqpashynyń ornyna oıynshyny shyǵardy. Bul taktıka óz jemisin berip, birinshi taımda jaraqat alǵanyna qaramastan, alańǵa shyqqan Brýno Koelo esepti teńestirip úlgerdi.
Osylaısha, negizgi ýaqyt 2:2 esebimen teń aıaqtaldy. 5 mınýttan qosymsha eki taım belgilendi. Oıynnyń bul kezeńinde Rıkardınıý jaraqat alyp qalsa, ıspanııalyqtar kóbirek shabýylǵa shyǵyp, birneshe múmkindikti múlt jiberdi. Birde tipti dop qaqpa jaqtaýynan keri qaıtty. Bir mınýtqa jetpeıtin ýaqyt qalǵanda, ıspanııalyqtardyń qaqpasyna penaltı belgilendi. Muny Brýno Koelo dál oryndady. Sanaýly sekýndtar qalǵanda, portýgalııalyqtardyń qaqpashysy Soýza óz komandasyn goldan qutqardy.
Sóıtip 3:2 esebimen jeńiske jetken Portýgalııa tuńǵysh ret Eýropa chempıony atandy.
Eske sala keteıik, jartylaı fınalda ıspanııalyqtar qazaqstandyqtarmen 5:5 esebimen teń oınap, tek penaltı nátıjesinde (3:1) ǵana jeńgen bolatyn. Al portýgalııalyqtar reseılikterdi 3:2 esebimen tize búktirgen edi. Al qola júlde úshin básekede Reseı Qazaqstan quramasyn 1:0 esebimen utty.
