Fýtzal: Qazaqstandyq qaqpashy álemniń úzdigi atandy
NUR-SULTAN. QazAqparat - Fýtzaldan Qazaqstan quramasy men Almatynyń «Qaırat» komandasynyń qaqpashysy Igıta (tolyq aty-jóni Leonardo de Melo Vıeıra Leıte) álemniń úzdik qaqpashysy atandy, dep habarlaıdy QazAqparat tilshisi Qazaqstan fýtbol federatsııasyna silteme jasap.
«Futsal Planet Awards» turaqty túrde álemdik fýtzaldaǵy úzdikterdi anyqtaıdy. Bıyl bul sharaǵa barlyǵy 244 respondent qatysty. Qazaqstandyq qaqpashy 693 ball jınady. Ol ıspandyq «Barselona» qaqpashysy Hýana Hose Angosto Ernandes «Hýanho» men Portýgalııanyń «Sportıng» klýbynyń brazılııalyq qaqpashysy Tıago Mendesa Rochýdy artta qaldyrdy.
Esterińizge sala ketelik, qazaqstandyq fýtzalshy bul ataqqa tórtinshe márte qol jetkizip otyr. Ol buǵan deıin 2015, 2016 jáne 2018 jyldary sondaı senimge ıe boldy.
Al fýtzaldan Qazaqstan quramasy men Almatynyń «Qaırat» komandasynyń bas bapkeri Kaka (Paýlo Rıkardo Fıgýera Sılva) áriptesteri arasynda úzdik úshtikke ilikti.
