Fýtzal: Qazaqstan Reseımen teń oınady
ASTANA. QazAqparat - Iranda ótip jatqan halyqaralyq fýtzal týrnırinde el quramasy alǵashqy upaıyna ıe boldy, dep habarlaıdy QazAqparat tilshisi.
Qazaqstan, Reseı, Iran jáne Ázerbaıjan quramalary qatysyp jatqan «Tórt ult» týrnıri búgin bastaldy. Kakaý shákirtteri birinshi oıynda Reseı quramasyn qabyldap, 3:3 esebimen teń oınady.
Birinshi goldy komanda kapıtany Shyńǵys Esenamanov soqty. Artynsha reseılikter Dmıtrıı Lyskov pen Artem Nııazovtyń kómegimen alǵa shyqty. Munan soń Esenamanov tarazy basyn teńestirdi. Kezdesý aıaqtalar tusta qos komanda taǵy bir-bir goldan engizip, teń tarqasty.
Endi ulttyq qurama erteń alań ıelerimen kezdesedi. Oıyn Astana ýaqytymen 20:30-da bastalady.
Eske salaıyq, «Tórt ult» týrnırinde komandalar bir aınalym ótkizedi. Eń kóp upaı jınaǵan qurama jeńimpaz atanady. Týrnır 6 jeltoqsanda aıaqtalady.
