Fýtzal: Qazaqstan quramasynyń qarsylastary ózara kezdesti
NUR-SULTAN. QazAqparat - Fýtzaldan 2022 jylǵy Eýropa chempıonatyna irikteý kezeńindegi Qazaqstan quramasy synǵa túsetin besinshi topta bir oıyn ótti. Atalǵan toptaǵy Vengrııa jáne Belarýs quramalary ózara sheberlik baıqasty, dep habarlaıdy QazAqparat tilshisi.
Esterińizge sala ketelik, budan buryn osy topta synǵa túsetin Izraıl jáne Qazaqstan quramalarynyń 28 qańtarǵa belgilengen oıyny keıinge shegerilgenin habarlaǵan edik.
Kezdesý Rıshon-le-Tsıon qalasynda ótýi tıis bolatyn. Atalǵan memlekette 26-31 qańtar aralyǵynda koronavırýstyń taralýyna jol bermeý maqsatynda halyqaralyq reıster jabyldy. Sondyqtan atalǵan oıyndy keıinge shegerý jóninde sheshim qabyldandy.
Al Vengrııa jáne Belarýs quramalary arasyndaǵy kezdesýde majar fýtzalshylary 2:1 esebimen jeńiske jetti. Alǵashqy týrda vengrııalyqtar Qazaqstannan 0:5 esebimen jeńilip qalǵan edi.
Al Belarýs quramasy syrt alańda Izraıldi 3:0 esebimen tize búktirdi.
Osylaısha týrnır kestesinde Qazaqstan, Vengrııa jáne Belarýs quramalarynyń qorjynynda úsh-úsh upaıdan bar. Olardan qazaqstandyq fýtzalshylardyń bir oıyny kem. Sońǵy oryndaǵy Izraıl ázirge upaıǵa qol jetkizgen joq.
Ekinshi týrdaǵy Izraıl men Qazaqstan quramalary arasyndaǵy oıynnyń qashan ótetini belgisiz. Eýropalyq fýtbol qaýymdastyqtary odaǵy (UEFA) eki qurama arasyndaǵy oıyn ótetin jańa merzimdi keıin belgileıtin boldy.
Úshinshi týrda qazaqstandyq fýtzalshylar óz alańynda 2 naýryzda Belarýsti qabyldasa, 3 naýryzda Vengrııa men Izraıl ózara kezdesedi.
