Fýtzal: Qazaqstan quramasynyń qarsylastary anyqtaldy
ASTANA. QazAqparat - Búgin fýtzaldan 2020 jylǵy Álem chempıonatynyń alǵashqy jáne negizgi satylarynyń jerebesi tartyldy, dep habarlaıdy QazAqparat tilshisi.
Qazaqstan quramasy atalmysh básekeni negizgi satysynan bastaıdy. Olar besinshi topqa ornalasqan. Bul topta ázirge bizdiń quramadan ózge Rýmynııa bar. Qalǵan eki qarsylasy jarystyń alǵashqy satysy ótkennen keıin anyqtalady.
Alǵashqy saty keler jyly 29 qańtar - 3 aqpan aralyǵynda ótkiziledi. Sodan keıin G tobynyń jeńimpazy men S tobynda ekinshi oryn alǵan quramalar besinshi topty tolyqtyrady. Aıta keteıik, G tobynda Nıderlandy, Chernogorııa, Bolgarııa jáne Estonııa, S tobynda Makedonııa, Albanııa, Grekııa jáne San-Marıno quramalary básekege túsedi.
Qazaqstan buǵan deıin Álem chempıonatynyń fınaldyq kezeńine eki márte shyqqan bolatyn. Alǵash 2000 jyly Gvatemalada ótken básekede A tobynda Brazılııadan 1:12, Gvatemaladan 5:6, Porýtalııadan 2:6 esebimen jeńildi. Osynyń nátıjesinde óz tobynda tórtinshi oryn aldy.
Al 2016 jyly Kolýmbııada ótken alamanda E tobynda ekinshi oryn ıelendi. Aldymen Argentınadan 0:1 esebimen jeńilgenimen, odan keıin Kosta-Rıkany 3:1, Solomon araldaryn 10:0 esebimen jeńdi. Jarystyń 1/8 fınaldyq satysynda Ispanııadan 2:5 esebimen jeńilip qaldy.
Jarystyń negizgi satysy 2019 jyldyń 22-27 qazan kúnderi ótedi. Besinshi top oıyndary Rýmynııada bolady.
Álem chempıonatynyń fınaldyq kezeńi 2020 jyldyń 13 qyrkúıegi men 4 qazany aralyǵynda Lıtvada ótkiziledi.
Esterińizge sala ketelik, Álem chempıonatynyń fınaldyq kezeńin ótkizýge Qazaqstan da usynys bildirgen edi. Sondaı-aq, osyndaı nıetin Kosta-Rıka, Iran, Japonııa, Jańa Zelandııa jáne Birikken Arab Ámirlikteri bildirdi. Nátıjesinde Lıtva dúbirli dodany ótkizý múmkindigine qol jetkizdi.
Aıta keterligi, fýtzaldan Álem chempıonaty 1989 jyldan beri ótkizilip keledi. Búgingi kúnge deıin Brazılııa 5, Ispanııa 2, Argentına 1 márte altynnan alqa taqty.
