Fýtzal: Qazaqstan quramasy Vengrııa komandasyn aıqyn basymdyqpen jeńdi
NUR-SULTAN. QazAqparat - Búgin fýtzaldan Qazaqstan quramasy 2022 jylǵy Eýropa chempıonaty irikteý kezeńindegi alǵashqy oıynynda Vengrııa quramasyn qabyldady, dep habarlaıdy QazAqparat tilshisi.
Búgingi kezdesýde qazaqstandyq fýtzalshylar oıyn basynan tizgindi qolyna aldy. Nátıjesinde birinshi kezeńde alań ıeleri qarsylastar qaqpasyna jaýapsyz tórt gol soqty. Ony Arnold Knaýb 7,13, Dáýren Nurǵojın 10, Albert Aqbalyqov 14-mınýttarda óziniń enshisine jazdy.
Ekinshi kezeńniń alǵashqy mınýtynda qazaqstandyq oıynshylar esepti ústemeleı tústi. Goldy 22-mınýtta Dáýren Tursaǵulov soqty. Oıynda Qazaqstan quramasy qarsylasynan 5:0 esebimen basym tústi.
Esterińizge sala ketelik, Qazaqstan quramasy besinshi topta synǵa túsedi. Qarsylastary - Vengrııa, Belarýs jáne Izraıl quramalary.
Endi qazaqstandyq fýtzalshylar 2021 jyldyń 28 qańtarynda syrt alańda Izraılmen kezdesedi.
Alǵashqy týrdan keıin Qazaqstan quramasy birinshi orynǵa shyqty. Ekinshi orynda Belarýs tursa, odan keıingi oryndarda Izraıl jáne Vengrııa quramalary keledi.
Árbir toptyń jeńimpazy men úzdik nátıjege jetken ekinshi oryndaǵy alty qurama fınaldyq kezeńge tikeleı joldama alady.
Al ekinshi oryndaǵy tómen nátıje kórsetken eki qurama 2021 jyldyń 14 jáne 17 qarasha kúnderi taǵy bir joldamaǵa talasady.
Fınaldyq týrnır 2022 jyldyń 9 qańtary men 3 aqpany aralyǵynda Nıderlandy elinde ótkiziledi.
Atalǵan topta búgin Belarýs syrt alańda Izraıldi 3:0 esebimen jeńip ketti.
