Fýtzal: Qazaqstan quramasy Slovenııamen sheshýshi oıyn ótkizedi
ASTANA. QazAqparat – Fýtzaldan Qazaqstan quramasy búgin álem chempıonatynyń 2-irikteý satysynda tórtinshi oıynyn ótkizedi, dep habarlaıdy QazAqparat tilshisi.
Dop dodasynda qazaqstandyq fýtzalshylar 5-topta synǵa túsýde. Qarsylastary - Slovenııa men Chernogorııa.
Búgin qazaqstandyq fýtzalshylar Slovenııamen sheberlik baıqasady. 2022 jyldyń 8 qazanynda elimizde ótken alǵashqy kezdesýde qazaqstandyqtar 2:0 esebimen jeńiske jetken bolatyn.
Kezdesý elorda ýaqytymen 22:50-de bastalyp, Qazsport telearnasynan tikeleı efırde kórsetiledi.
Sondaı-aq, olar Chernogorııany 7:0, 5:1 esebimen tize búktirgen edi.
El quramasy 5-topta 3 oıynnan keıin 9 upaımen kósh bastap keledi. Al Slovenııanyń enshisinde 6 upaı bar.
Endi el quramasy Slovenııamen kezdesýde kem degende teń túsken jaǵdaıda elıtalyq satyǵa joldama alady.
Fýtzaldan Qazaqstan quramasy álem chempıonatynyń elıtalyq satysynda 2000, 2016, 2021 jyldarda synǵa tústi. Olar 2021 jyly 4-orynǵa taban tiredi.
