Fýtzal: Qazaqstan quramasy óz tarıhynda tuńǵysh ret Eýropanyń qola júldegeri atandy
ASTANA. QazAqparat - Serbııanyń Belgrad qalasynda fýtzaldan Eýropa chempıonatynyń qola júlde úshin básekesinde Qazaqstan quramasy alań ıelerimen kúsh synasyp, 5:2 esebimen jeńiske jetti.
Oıynnyń birinshi taımy komandalardyń alma-kezek shabýylymen ótti. Chempıonattyń mergen oıynshylarynyń biri Serik Jamanqulov pen Mıhaıl Pershınniń tepken doptary qaqpa mańdaıshasynan qaıtsa, serbııalyqtardan Vladımır Razıch alǵa shyǵyp ketken Igıtadan dopty asyrýǵa tyrysty. Biraq Leo baspen dopty der kezinde qaıtara bildi. Degenmen birinshi taım bitýge onshaqty sekýnd qalǵanda, serbııalyq qaqpashy Mıodrag Aksentıevıchti qapy qaldyrǵan Dýglas esep ashyp, Qazaqstandy alǵa shyǵardy.
Ekinshi taım alań ıeleriniń shabýylymen bastalǵanymen, bir mınýt óter-ótpeste Serik Jamanqulov sol qaptaldan osy birinshiliktegi altynshy dobyn soǵyp, esepti 2:0-ge jetkizdi. Mergendik jaǵynan Serik portýgalııalyq Rıkardınomen teńesti. Budan keıin Aleksandr Dovgan qaqpashymen jeke-dara shyqqanymen, óz múmkindigin paıdalana almady.
Kóp uzamaı Dýglas oń qaptaldan sýyrylyp shyǵyp, taǵy da mergendik tanytty. Osydan soń serbııalyqtar qaqpashysyn alyp tastap, oınaýǵa kóshti. Biraq olardyń bul taktıkasy ózin-ózi aqtamady. Dopty qaqshyp alǵan Igıta óz qaqpasynyń mańynan áýelete soǵyp, dál kózdep, tórtinshi goldyń avtory atandy. Budan keıin Dýglas óziniń osy oıyndaǵy úshinshi dobyn soqty. Match aıaǵyna taman serbııalyqtar Stefan Rakıch pen Slobodan Raıchevıch esepti 5:2-ge deıin qysqartty.
Sóıtip bilikti bapker Kakaýdyń shákirtteri Eýropa birinshiligine tuńǵysh ret qatysqanyna qaramastan, aıdy aspanǵa shyǵaryp, qola júldeger atandy. Ásirese, olar shırek fınalda Eýropa chempıony Italııa quramasyn jeńip, sensatsııa jasady.
Altyn júlde úshin Eýropanyń alty márte chempıony Ispanııa men osy birinshiliktiń qos dúrkin kúmis júldegeri atanyp úlgergen Reseı quramalary talasady.
Eske sala keteıik, endi qazaqstandyqtar ózara básekede Polsha quramasymen 14 qyrkúıek - 2 qazanda Kolýmbııada ótetin álem chempıonatyna beriletin joldamany sarapqa salady. Kakaýdyń shákirtteri birinshi oıyndy 22 naýryzda syrt alańda ótkizse, sodan keıin 12 sáýirde óz alańynda qabyldaıdy.
