Fýtzal: Qazaqstan quramasy Eýropa chempıonyn utyp, jartylaı fınalǵa joldama aldy

Qazaqstan mundaı dodaǵa alǵash ret qatysyp jatsa, Italııa quramasy Eýropa chempıony ǵana emes, álem birinshiliginde kúmis, qola júldeger atanyp júrgen myqty komanda edi. Osyǵan deıin qaqpasyna birde-bir gol ótkizbegen ıtalıandyqtar (bul komandanyń da negizin brazılııalyqtar quraıdy) Qazaqstannan mundaı toıtarys alamyz dep kútpese kerek.
Esesine qazaqstandyqtar batyl qımyldap, qarsylasynyń qadamyn tusap tastady. Qazaqstandyq qaqpashy Igıtanyń shabýylǵa qosylýy da ıtalıandyqtardy ábden abdyratty. Sondaı shabýyldardyń birinde komanda kapıtany Dinmuhambet Súleımenovten dál pas alǵan Leo birinshi goldy soqty. Kóp uzamaı Leonyń qatty soqqysyn álemdegi úzdik qaqpashylardyń biri delinetin Stefano Mammarella qaqshyp ustaı almaǵannan keıin ony Serik Jamanqulov qaqpaǵa súńgitti. Bul chempıonat mergenderiniń biri Seriktiń tórtinshi goly edi.

Ekinshi taımda erekshe silkinip shyqqan ıtalıandyqtardan Fortıno 23-mınýtta esepti qysqartty. Biraq 30 sekýnd óter-ótpeste ıtalıandyqtardyń qatesin paıdalanǵan Shyńǵys Esenamanov esepti 3:1-ge jetkizdi. Budan keıin Italııa quramasy qaqpashysyn alyp tastap, oınaýǵa kóshti. Sondaı sátte S.Jamanqulov alystan baǵyttaǵan dop bos qalǵan qaqpadan qıys ketti. 37-mınýtta Kanal esepti qaıta 3:2-ge deıin jetkizdi. Osy sátte Qazaqstan quramasynyń bas bapkeri Kakaý úzilis alyp, oıynshylar alańǵa shyqqan mezette qazaqstandyqtar taǵy bir goldy soqty. Úzdik oıynshylardyń biri Shyńǵys Esenamanov tepken dop baǵanadan keri qaıtqanmen, qaqpa aldyndaǵy bul múmkindikti Dáýren Nurǵojın múlt jibergen joq. Sońǵy sekýndtarda Leo alystan bos qalǵan qaqpany dál kózdep, qos goldyń avtory atandy.

Osylaısha Eýropa chempıonyn qapy qaldyrǵan Qazaqstan quramasy jartylaı fınalǵa shyqty. Jartylaı fınal kezdesýleri beısenbi kúni ótedi. Aldymen alań ıeleri Serbııa men Reseı quramalary oınaıdy. Sodan keıin Qazaqstan men álemdegi taǵy bir myqty komandalardyń biri Ispanııa kúsh synasady. Ókinishke qaraı, Italııamen oıynda chempıonattaǵy ekinshi eskertýin alǵan qaqpashy Igıta Ispanııamen kezdesýge qatysa almaıdy.