Fýtzal: Qazaqstan quramasy Eýropa chempıonatynda alǵashqy tarıhı jeńisine qol jetkizdi
ASTANA. QazAqparat - Serbııanyń Belgrad qalasynda fýtzaldan ótip jatqan Eýropa chempıonatynyń S tobynda Qazaqstan quramasy ekinshi kezdesýin Horvatııamen ótkizip, 4:2 esebimen jeńiske jetti.
«Qazaqstan» telearnasynan kórsetkenindeı, birinshi taımda 6-mınýtta Qazaqstan quramasynan Dýglas mergendik tanytyp, esep ashty. Degenmen bir mınýttan keıin Qazaqstan quramasynyń kapıtany Dinmuhambet Súleımenovtiń qateliginen keıin horvattar (Vedran Matoshevıch) tarazy basyn teńestirdi. Іle-shala D.Súleımenov horvattardyń oıynshysyn ádemi aldap ótip, esepti 2:1-ge jetkizdi. 17-mınýtta Serik Jamanqulov qarsylastar qaqpasyn dál kózdedi.
Ekinshi taımda S.Jamanqulov óziniń ekinshi golyn saldy. Budan keıin horvattar qaqpashysyn alańdaǵy oıynshyǵa aýystyryp, shabýyldaýǵa tyrysyp baqty. Olardyń bul taktıkasy bir ret qana jemisin berip, Sýton esepti 4:2-ge qysqartty. Osydan soń S.Jamanqulovtyń da, Shyńǵys Esenamanovtyń da gol soǵatyndaı múmkindikteri boldy.
Sóıtip Qazaqstan quramasy Eýropa chempıonatyndaǵy alǵashqy da mańyzdy jeńisine qol jetkizdi. S tobynda endi bir ǵana oıyn qaldy. 7 aqpan kúni Reseı men Horvatııa sońǵy kezdesýin ótkizip, osy toptan pleı-offqa joldama alǵan qos komanda belgili bolady.
Eske sala keteıik, budan buryn Kakaýdyń shákirtteri reseılikterge 1:2 esebimen ese jibergen bolatyn.
