Fýtzal: Qazaqstan quramasy Eýropa chempıonaty fınaldyq kezeńine joldama aldy
NUR-SULTAN. QazAqparat - Fýtzaldan Qazaqstan quramasynyń 2022 jylǵy Eýropa chempıonatyna fınaldyq kezeńine eki týr buryn joldama aldy. Qazaqstandyqtar toptyq irikteý kezeńinde búgin, 6 cáýirde cyrt alańda Vengrııadan basym tústi, dep habarlaıdy QazAqparat tilshisi.
Esterińizge sala ketelik, qazaqstandyq fýtzalshylar besinshi topqa tústi. Qarsylastary - Vengrııa, Belarýs jáne Izraıl quramalary.
Búgingi oıynda qazaqstandyq fýtzalshylar qarsylastar qaqpasyna alty gol saldy. Ony Shyńǵys Esenamanov 5, Azat Valıýllın 9, Taınan 10, Dýglas Jýnıor 23, Albert Aqbalyqov 33-mınýttarda óziniń enshisine jazdy. Al 14-mınýtta vengrııalyq Imre Nod óziniń qaqpasyna gol soǵyp aldy. Oǵan alań ıeleri bir golmen jaýap qaıyrdy. Osylaısha Qazaqstan quramasy qarsylasynan 6:1 esebimen basym tústi.
Aıta keteıik, buǵan deıin qazaqstandyq fýtzalshylar úsh oıyn ótkizdi. Onyń barlyǵynda jeńiske jetti. Aldymen elordada búgingi qarsylasy - Vengrııany 5:0 esebimen tize búktirse, odan keıin Belarýsten 5:2 esebimen basym tústi. Úshinshi oıynda syrt alańda Belarýsti 5:1 esebimen súrindirdi.
Búgin atalǵan topta Belarýs quramasy óz alańynda Izraıldi 14:0 esebimen tize búktirdi.
Endi qazaqstandyq fýtzalshylar 9 jáne 11 sáýir kúnderi Izraıl quramasymen eki kezdesý ótkizedi. Koronavırýs ınfektsııasynyń aldyn alý sharalaryna oraı eki oıyn da elordada ótedi.
Aıta ketelik, qazaqstandyq fýtzalshylar budan buryn Eýropa chempıonaty fınaldyq kezeńinde eki márte baq synady. 2016, 2018 jyldarda qola júlde aldy. Eýropa chempıonatynyń fınaldyq satysy 2022 jyldyń 19 qańtar jáne 6 aqpan aralyǵynda Nıderlandynyń Amsterdam jáne Gronıngen qalalarynda ótkiziledi.
